Гъэ къэс нэхъыбэ мэхъу Кавказ Ищхъэрэ турист кластерым и ку­рортхэм зыщызыгъэпсэхухэм я бжыгъэр. Нэгъабэрей лэжьыгъэм кърикIуахэр къызэрабжыжам къи­гъэ­лъэгъуащ 2017 гъэм елъытауэ ди деж къакIуэ туристхэм Iыхьэ плIанэ хуэдизкIэ къызэрыхэхъуар.

УФ-м и Федеральнэ Зэхуэсым ФедерацэмкIэ и Советым и зэIущIэм Правительствэм щыхухаха зэманым хиубыдэу къыщыщыпсалъэм Урысей Федерацэм Кавказ Ищхъэрэм и Iуэху­хэмкIэ и министр Чеботарёв Сергей къигъэлъэгъуащ 2018 гъэм къриубыдэу ди щIыналъэм цIыху мин              730-м щIигъум зэрызыщагъэпсэхуар.
«ИлъэсыщIэ махуэхэм «Архъыз», «Iуащхьэмахуэ» курортхэм турист мин 91-рэ щыIащ. Апхуэдэу Шэшэн Республикэм «Ведучи» курортыщIэр къыщызэIуахащ», - жиIащ абы.
Министрым къыхигъэщхьэхукIащ курортхэм зэпымыууэ зрагъэужьын папщIэ Урысейм и Правительствэм    и унафэкIэ гъэ къэс бюджет инвестицэхэр къызэраутIыпщынур. Абы къы­дэкIуэу Кавказ Ищхъэрэм и турист кластерым зегъэужьынымкIэ проектыр гъэзэщIэным бюджетым щымыщ ахъшэ куэди трагъэкIуэдэнущ. «Ищ­хьэкIэ къыщызгъэлъэгъуа курортищми 2018 гъэм яхузэфIэ­-кIащ уней мылъкуу къагъэсэбэпым хагъэхъуэн икIи ахэр зыгъэп­сэху­пIэхэм я инфраструктурэр егъэфIэ­кIуэным хуэгъэзауэ къагъэсэбэп», - жиIащ Чеботарёв Сергей.
Докладым IупщIыу къыхэщащ ди щIыналъэм и экономикэм зегъэу­жьынымкIэ туризмэр хэкIыпIэ нэхъыщхьэхэм зэращыщыр, абы къы­хэкIыу Урысейм Кавказ Ищхъэрэм и IуэхухэмкIэ и министерствэм а IэнатIэм зэпымыууэ и нэIэ зэтригъэтынур. «2019 гъэм ди мурадщ Ингуш Республикэм щыIэ «Армхи» курортым зегъэужьынымкIэ, апхуэдэу Дагъыс­тэн Республикэм тенджыз Iуфэм Iут и курортыр зэтегъэувэнымкIэ концепцэхэр пхыдгъэкIыну. Осетие Ищхъэрэм - Алание Республикэм егъэ­хьэзыр «Мамисон» турист рекреацэ комплексыр зи лъабжьэ экономикэ щIыналъэ хэхар зэтегъэувэжыным ехьэлIа проектыр икIи а мурадыр къэралым и президентым къыддиIыгъащ», - жиIащ и псалъэр щиухым ­министрым.
Кавказ Ищхъэрэм апхуэдэу щагъэзэщIэнущ илъэс псом лажьэ курортхэр къызэгъэпыщыным теухуауэ Урысейм и Правительствэм и Уна­фэщIым къигъэува къалэныр. ЩIы­налъэм туризмэм и лъэныкъуэкIэ иIэ хэкIыпIэхэр зэгъэуIуауэ къэгъэсэбэпа хъун папщIэ Урысейм Кавказ Ищхъэрэм и IуэхухэмкIэ и министерст­-вэм игъэхьэзыращ 2035 гъэм нэсыхукIэ Кавказ Ищхъэрэ Федеральнэ ­округым туризмэм зыщегъэужьынымкIэ стратегием и проектыр. А документыр УФ-м и Правительствэм хуа­гъэхьащ икIи ар мы гъэм къриубыдэу къащтэну щогугъ.