2024 гъэм и япэ мазищым къэралым и щIыналъэхэм промышленнэ продукцэу псори зэхэту къыщIагъэкIам и куэдагъымкIэ Къэбэрдей-Балъкъэрыр нэхъыфIищым яхыхьащ. Нэгъабэ и апхуэдэ лъэхъэнэм щыIа бжыгъэхэм я Iыхьэ плIанэм щIигъукIэ мы гъэм хигъэхъуащ республикэм, процентым хуэбгъакIуэмэ, 125,4-кIэ нэхъыбэ.

Апхуэдэ бжыгъэхэр иджыблагъэ къитащ Урысей Федерацэм Къэрал статистикэмкIэ и федеральнэ къулыкъум, дызэрыт илъэсым и япэ мазищым УФ-м щыщыIа экономикэ щытыкIэр къипщыта нэужь.

         УФ-м и щIыналъэхэм ящыщу бжьыпэр зыIыгъыр Курган областырщ - проценти 139,6-рэ, етIуанэр Осетие Ищхъэрэ – Аланиерщ - проценти 129,9-рэ. Нэгъабэ промышленнэ продукцэу къыщIагъэкIам  нэхърэ мы гъэм  я  ехъулIэныгъэхэр нэхъ мэщIащ Тывам - процент 81,2-рэ, Еврей автономнэ округым - процент 92,8-рэ, Къалмыкъым процент 94,3-рэ.

         «Росстат»-м и докладым къыщызэщIэкъуащ 2024 гъэм и япэ мазищым имызакъуэу, абыхэм къакIэлъыкIуэ мэлыжьыхьри хэту Урысейм социально-экономикэ и лъэныкъуэкIэ щыщыIа щытыкIэр. Зэпалъытащ промышленностым, ухуэныгъэм, мэкъумэшым, транспортымрэ связымрэ, къэрал кIуэцI-щIыб сатум, опт-розницэм, уасэхэм, финансхэм, лэжьыгъэ IэнатIэхэмкIэ цIыхухэр къызэрызэгъэпэщам, абыхэм я псэукIэ-щыIэкIэхэм, цIыху бжыгъэм къыхэхъуэ-хэщIым, нэгъуэщIхэми ехьэлIауэ Iуэхухэр зыIутыр.

         Докладым апхуэдэуи къыщагъэсэбэпащ УФ-м и языныкъуэ министерствэхэмрэ ведомствэхэмрэ къата хъыбархэри.

                                                              ХЬЭЩЫКЪУЕЙ Олег.