«Урысей зэкъуэт» партым Москва къалэм дыгъуасэ щригъэкIуэкIа ХХ съездым хэтащ КIуэкIуэ Казбек и пашэу Къэбэрдей-Балъкъэрым икIа делегацэр.
Урысейм и Президент Путин Владимир Владимир и къуэм «Урысей зэ­къуэтым» и съездым къыщипсэлъар ди республикэм и Iэтащхьэм а зэхыхьэшхуэм и Iуэхугъуэ нэхъыщхьэу къилъытащ.
Урысейм и Президент Путин Владимир къигъэуващ къэралым и цIыхухэм я псэу­кIэр егъэфIэкIуэнымкIэ, сабий зиIэ уна­гъуэхэр тхьэмыщкIагъэ хэмыгъэхуэнымкIэ 2026 гъэм нэсыху зыхуэфащэ Iуэху псори ялэжьыну. Абы къыхигъэщхьэхукIащ нобэм ирихьэлIэу зэфIагъэкIа IуэхуфIхэр, абыхэм лъэпкъ проектхэр гъэзэщIэныр, инфраструктурэр зэтегъэувэнымрэ ар къэгъэщIэрэщIэжынымрэ яхэту, лэжьыгъэкIэ щIэгъэбыдэн зэрыхуейрщ.
Урысейм и Президентым и псалъэм къы­щыхигъэщхьэхукIа социальнэ Iуэху­хэм ди республикэм и дежкIи мыхьэнэш­хуэ яIэщ. Къапщтэмэ, Президентым жи­Iащ илъэ­ситху благъэм къриубыдэу курыт еджапIэхэр, псом хуэмыдэу къуажэхэм щы­Iэхэр, капитальнэу зэгъэпэщыжынымкIэ программэ щхьэхуэ гъэхьэзырын зэ­рыхуейр.
Абы и лъэныкъуэкIэ КъБР-м и Iэтащхьэ КIуэкIуэ Казбек и унафэкIэ лэжьыгъэ пыухыкIахэр щрагъэжьащ: школ псоми я щытыкIэр къапщытащ икIи ахэр зэгъэпэщыжыныр зэманкIэ зэщхьэщыхауэ ирагъэкIуэкIынущ.
Президентым жиIащ партым къарууш­хуэ зэрыбгъэдэлъыр икIи апхуэдэ зэфIэ­кIыр цIыхухэм, ди къэралым я сэбэп зыхэлъхэм ятещIыхьауэ, ди политикэ системэм и зэпIэзэрытыныгъэр гъэбыдэным хуэунэтIауэ къэгъэсэбэпын зэрыхуейр. Жылагъуэмрэ къэралымрэ я иджырей щытыкIэм, иджыпсту къыдбгъэдэхуэ къалэн инхэр дэгъэкIыным я лъэныкъуэкIэ абы мыхьэнэ хэха иIэщ. А къалэн инхэр псом япэу зыхуэгъэзар лъэпкъыр хъумэ­нырщ, Урысей Федерацэм и щIыналъэ псоми исхэм я псэукIэр егъэфIэкIуэнырщ.
«Урысей зэкъуэтым» и лэжьыгъэм и унэ­тIыныгъэ нэхъыщхьэр социальнэ зыу­жьыныгъэрщ. Абы щыхьэт тохъуэ фэ фе­деральнэ, щIыналъэ IэнатIэхэм къы­щыхэфлъхьэ, щыдэфIыгъ законопроектхэр, апхуэдэу цIыху щхьэхуэхэм, волонтёр, экологие, къинэмыщI зэгухьэныгъэхэм я жэрдэму «Урысей зэкъуэт» партым и дэIэпыкъуныгъэкIэ ягъэзащIэхэр. «Урысей зэкъуэтыр» сытым дежи хущIокъу езым и лэжьыгъэр цIыхухэм я мурадхэмрэ гурыщIэхэмрэ зэрыригъэзэгъыным. Ар сыт хуэдэ политикэ лэжьыгъэми егъэлеяуэ мыхьэнэшхуэ зиIэ и Iыхьэщ. Абы къыхэкIыу быдэу си фIэщ мэхъу зэIущIэ щхьэхуэхэм цIыхухэм къыщаIэтахэр, пэуб­лэ парт IэIэтым, гъэ кIуам и дыгъэгъазэ мазэм ирагъэкIуэкIа социальнэ онлайн-зэIущIэшхуэм щыжаIахэр хэхыныгъэм ирихьэлIэу вгъэхьэзыр программэм Iэмал имыIэу зэрыхэхуэнур, а программэм и ­лъабжьэу зэрыувынур, нэхъыщхьэ дыдэр арщи - фи дэIэпыкъуныгъэкIэ а псори гъэ­зэ­щIа зэрыхъунур», - жиIащ Президентым.
«Псори фызэрыщыгъуазэщи, адэр е анэр зэрымысыж унагъуэхэм я сабийуэ илъэси 8-м щегъэжьауэ илъэс 16-м нэс зи ныбжьхэм бадзэуэгъуэм и 1-м щыщIэдзауэ ахъшэкIэ дэIэпыкъунущ. ГъащIэм Iэджи­ къыщохъу, ауэ балигъ мыхъуам, сабийм зыщIэдгъэкъуэну ди къалэнщ. Ап­хуэ­дэу дэIэпыкъуныгъэ ягъуэтынущ зи Iуэхур зэ­кIэлъымыкIуэ, мылъкукIэ хуэ­мы­щIа анэ­хэм. Нэхъыбэ ящIынущ зи ныбжьыр илъэси 8-м фIэмыкIа сабийхэр зэрысымаджэм къыхэкIыу лэжьакIуэ мыкIуэф адэ-анэм ират ахъшэр, - къыхигъэщхьэхукIащ Пре­зидентым. - дэ зэтедгъэувэн хуейщ сабий зиIэ унагъуэу нэхъ хуэмыщIахэм дазэ­рыдэIэпыкъун системэ тэмэм. Апхуэдэ ­къалэн Правительствэм хуэдгъэуващ. А псоми япкъ иткIэ зэфIэкIыу диIэр зэщIэдгъэуIуэу делэжьын хуейщ сабий зиIэ унагъуэхэр тхьэмыщкIагъэ хэхуэнымкIэ шынагъуэр 2026 гъэм и кIэм нэсыху ящхьэ­щыхыным. Зэрыщыту къапщтэмэ, дэ къытпэщытщ урысей унагъуэхэм я псэу­кIэр, ди цIыхухэм я хэхъуэхэр нэрылъагъуу къэтIэтыну. Зэман гъунэгъум къриубыдэу ягъэзащIэу щIадзэнущ щIалэгъуалэр лэжьыгъэкIэ къызэгъэпэ­щыным хуэгъэза программэр».
«Япэ игъэщыпхъэ лэжьыгъэшхуэщ узын­шагъэр хъумэнымкIэ IэнатIэм и техно­логие лъабжьэр къэгъэщIэрэ­щIэ­жыныр, ар кадрхэмкIэ къызэрызэгъэпэщар егъэ­фIэкIуэныр, поликлиникэ, сымаджэщ псоми я лэжьэкIэр сымаджэм и Iуэхур нэхъ тынш зэрыхъунум хуэунэтIы­ныр. Псори дызэрыщыгъуазэщи, дызэрыт илъэсым ягъэзащIэу щIадзащ узыншагъэр хъумэнымкIэ IэнатIэм и пэублэ IуэхущIапIэхэр къэгъэщIэрэщIэжынымкIэ щIыналъэ программэхэр. Ди жагъуэ зэрыхъущи, пандемием и зэранкIэ абы хиубыдэ лэ­жьы­гъэхэм я графикыр зыкъомкIэ япэ­кIэ ддзын хуей хъуащ, щIэуэ къэува Iуэху мытыншхэр дэгъэкIыным ахъшэм щыщ Iыхьэ зэрытекIуэдам къыхэкIыу. Дауэ мыхъуми, лэжьыгъэхэр ирагъэжьащ икIи ахэр адэкIэ къэувыIэ имыIэу екIуэкIынущ. Узыншагъэр хъумэнымкIэ IэнатIэм и пэуб­лэ IуэхущIапIэхэр къэгъэщIэрэщIэжынымкIэ щIыналъэ программэхэр гъэзэщIэным псори зэхэту сом мелуан 550-рэ хухахащ. Нобэ узыншагъэр хъумэнымкIэ IэнатIэм узыр гъэхъужыным и мызакъуэу, къыпэ­щытщ цIыхум и узыншагъэр адэкIэ тэмэму псэун папщIэ нэсу зэтригъэувэжыну.
Нобэ «Урысей зэкъуэтыр» сыт хуэдэ IэнатIэми щыпашэщ, властым законхэр къыдэзыгъэкI органхэм, лIыкIуэ, муниципальнэ органхэм увыпIэ нэхъыщхьэ щеубыд. Апхуэдэу фигу къэзгъэкIыжыну сы­хуейщ дэтхэнэ щIыналъэми, къалэми, посёлкэми щевгъэкIуэкI Iуэхухэр нэсу дэ­кIын папщIэ фи акъылэгъухэр, сэбэпынагъ­ къэзыхьыну хущIэкъу цIыху псори щIэгъэкъуэн къэщIын зэрыхуейр. Шэч хэмылъу, ар тегъэщIапIэ лъэщщ, цIыхухэм, ди къэралым я сэбэп зыхэлъхэм хуэунэтIащ, ди политикэ системэм и зэпIэзэрытыныгъэр къызэрегъэпэщ, абы къыхэкIыу иджырей жылагъуэмрэ къэралымрэ я дежкIэ, нобэ къытпэщыт Iуэхушхуэхэр гъэ­зэщIэнымкIэ мыхьэнэ хэха иIэщ», - жиIащ Путин Владимир.