Къэрал кIуэцI IуэхухэмкIэ министру КъБР-м щыIэ Павлов Василий ведомствэм и медико-санитар частым и лэжьакIуэхэм яритащ Урысей Федерацэм и МВД-м, КъБР-м щыIэ МВД-м я фIыщIэ, щIыхь тхылъхэр.
Я лэжьыгъэ къалэнхэр хьэлэщ зэрагъэзащIэм, я зэфIэкI лъагэм, Урысей Федерацэм Къэрал кIуэцI IуэхухэмкIэ и министерствэм узыншагъэр хъумэнымкIэ и IэнатIэм хуащIа хэлъхьэныгъэм, апхуэдэуи коронавирус уз зэрыцIалэм цIыхухэр щыхъумэным, ар зэуэлIахэм еIэзэным ехьэлIауэ ирагъэкIуэкI лэжьыгъэм папщIэ Урысей Федерацэм къэрал кIуэцI IуэхухэмкIэ и министрым и къуэдзэ, полицэм и генерал-лейтенант Шуликэ Виталий къыбгъэдэкI фIыщIэ тхылъыр хуагъэфэщащ КъБР-м щыIэ МВД-м и Медико-санитар часть узыншагъэр хъумэнымкIэ федеральнэ кIэзонэ IуэхущIапIэм и госпиталым зэгъэтIылъэкI зимыIэ медицинэ дэIэпыкъуныгъэмкIэ и къудамэм и дохутыр-хирург, къэрал кIуэцI къулыкъум и лейтенант нэхъыжь Щауэ Мухьэмэд.
Я къалэнхэр нэсу зэрагъэзащIэм, лэжьыгъэм щаIэ ехъулIэныгъэхэм папщIэ КъБР-м щыIэ МВД-м и щIыхь тхылъхэр иратащ поликлиникэм и унафэщI, къэрал кIуэцI къулыкъум и капитан Жырыкъ Алимрэ поликлиникэм и къудамэхэм ящыщ зым и унафэщIым и къуэдзэ Тхьэмокъуэ Русланрэ. Къэрал кIуэцI IуэхухэмкIэ министру КъБР-м щыIэм къыбгъэдэкI фIыщIэ тхылъыр хуагъэфэщащ медсестра нэхъыщхьэ Темыр Иринэрэ ЦГСЭН-м и бактериологие-лабораторэм и фельдшер-лаборант Кочкаровэ Джульеттэрэ.
Полицэм и генерал-майор Павлов Василий ведомствэм и медико-санитар частым и IэщIагъэлIхэм я къалэныр хьэлэлу зэрырахьэкIым папщIэ фIыщIэ яхуищIащ, я лэжьыгъэми къулыкъуми адэкIи ехъулIэныгъэхэр щызыIэрагъэхьэну ехъуэхъуащ.
«Си гум къыбгъэдэкIыу фIыщIэ фхузощI фи бэшэчагъымрэ гуапагъэмрэ папщIэ», - къыхигъэщащ министрым.