НыбжьыщIэхэр тхылъ еджэным дегъэхьэхыным хуэунэтIа «Еджэным елIалIэр и лъэпкъым и къэкIуэнум иропIейтей» программэм ипкъ иткIэ, хабзэ хъуауэ, ди щIыналъэм гъэ къэс къыщызэрагъэпэщ «Ди псалъэм къыпэджэжынур» литературэ зэпеуэр, «Лъэпкъ, тхыдэ, псэкупсэ гъэсэныгъэхэм литературэм щиубыд увыпIэр» проектыр. А Iуэхугъуэхэм я жэрдэмщIакIуэр «Тхылъ фIыуэ зылъагъухэм я республикэ зэгухьэныгъэращ» (унафэщIыр Шинкарёвэ Натальещ). Ахэр даIыгъащ КъБР-м и ТхакIуэхэм я зэгухьэныгъэмрэ КъБР-м ЩэнхабзэмкIэ и министерствэмрэ.
Илъэсым и пэщIэдзэм траухуауэ щыта а Iуэхугъуэхэр ирагъэкIуэкIыфащ, коронавирус уз зэрыцIалэр ди щIыпIэм къэмыс щIыкIэ. Абыхэм къарикIуахэм хэплъэжынуи хунэса-ми, зэпеуэхэм хэтахэр ягъэпэжэну иджыщ Iэмал къыщыкъуэкIар. Налшык дэт Киноконцерт гъэлъэгъуа-пIэм илъэси 10 лъандэрэ Iэтауэ щызэхашэу щыта гуфIэгъуэ зэIущIэр мы махуэхэм къыщызэрагъэпэщащ къалащхьэм и курыт школ №27-м и актовэ пэшым.
- Мыгъэрей зэхьэзэхуэхэр тедухуат 2020 илъэсым зи юбилейхэр хиубыдэ лъэпкъ усакIуэхэу КIуащ БетIал, Iу- тIыж Борис, Гуртуев Берт, Кулиев Хьэжмусэ, - жиIащ Iуэхум и къызэгъэпэщакIуэ, жылагъуэ зэгухьэныгъэм и пашэ Шинкарёвэ Наталье. - Зэпеуэхэм ныбжьыщIэ куэд хэтащ, ди гуапэ зэрыхъунщи.
Зэпеуэр унэтIыныгъитIу зэщхьэщыхауэ къызэрагъэпэщат. «Художественнэ псалъэ» Iыхьэм сабийхэр усакIуэхэм я къалэмыпэм къыпыкIа тхыгъэхэм къеджащ. «Литературэ зэдзэкIыныгъэм» дихьэх еджакIуэ-хэр а лэжьыгъэ хьэлэмэтым я зэфIэкIым щеплъыжащ. НыбжьыщIэхэм зэпеуэм хуагъэхьэзыра лэжьыгъэм хэплъэжа къэпщытакIуэ гупым абыхэм къахихыфащ фIым я фIыж лэжьыгъэхэр. Ахэр куэд хъурт, ауэ дэтхэнэри гулъытэ зыхуэщIыпхъэт.
Зи лэжьыгъэхэр нэхъыфIу къалъыта ныбжьыщIэхэм хуагъэфэща щIыхь, фIыщIэ тхылъхэр гуфIэгъуэ щытыкIэм иту щратыжащ курыт школым. Пшыхьыр игъэдэхащ Iуэхум къыхузэрагъэпэща концертым.