Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым IэнатIэхэм зегъэужьынымкIэ и центрымрэ медицинэмкIэ и къудамэмрэ зэIущIэ гъэщIэгъуэн иджыблагъэ щекIуэкIащ. Дохутыр IэщIагъэ зэзыгъэгъуэтауэ а IэнатIэмкIэ лэжьэну къызыпэщылъ щIалэгъуалэмрэ медицинэ IуэхущIапIэхэм я унафэщIхэмрэ щызэхуэза зэIущIэр университетым гъэкIэ щекIуэкIхэм яхуэмыдэу, къудамэ къэс щхьэхуэу зэхашэмэ, щхьэж и IэщIагъэм хэлъ щхьэхуэныгъэхэр къызыгурыIуэ, дэтхэнэми и зэхэщIыкIымрэ зэфIэкIымрэ къыщылъагъуэ зэхуэсу зэхашэмэ нэхъыфIу къалъытащ къызэгъэпэщакIуэхэм.

КъБКъУ-м хыхьэ институтхэм къыщызэрагъэпэщ мыпхуэдэ зэIущIэхэр зэрыщхьэпэр занщIэу нахуэ хъуащ. Япэрауэ, ар университетым зыхуигъэувыж къалэнхэр гъэзэщIэным толажьэ, нэгъуэщIу жыпIэмэ, щIалэгъуалэмрэ ахэр лэжьапIэ зыгъэувыфыну унафэщIхэмрэ хэубыдыкIауэ зэрешалIэ, зэрегъэпсэлъылIэ, сыт хуэдэ IуэхущIапIэр сыт хуэдэ IэщIагъэлI хуэныкъуэми нахуэ къещI. ЕтIуанэрауэ, IэнатIэ пыухыкIам пэрытхэм IэщIагъэлI ныбжьыщIэхэм зрагъэгъуэта щIэныгъэр здынэсыр, абы зэрыхащIыкIыр зыхуэдэр псалъэмакъым здыхэтым зэрагъэщIэну Iэмал къет.

Апхуэдэу щIалэгъуалэм набдзэгубдзаплъэу яхэплъэну, лэжьакIуэщIэу къащтэнухэм ядэуэршэрыну зэхуэсым кърихьэлIащ КъБР-м узыншагъэр хъумэнымкIэ и министрым и къуэдзэ Аникушинэ Татьянэ, Налшык дэт поликлиникэ №I-м и дохутыр нэхъыщхьэ Къаскъул Iэулият, ХьэцIыкIу Анатолэ и цIэр зэрихьэу Шэджэм дэт сымаджэщым и унафэщI КIуэкIуэ Еленэ, Дзэлыкъуэ щIыналъэм цIыхухэм я узыншагъэм щыкIэлъыплъ и IуэхущIапIэм и унафэщI Лыджыдэ Аксанэ, КъБР-м цIыхухэм я псэлъынтхуэ узыншагъэм щыкIэлъыплъ диспансерым и дохутыр нэхъыщхьэ Сэбаншы Юсуп, КъБР-м жьэн узыр зыпкърытхэм еIэзэнымкIэ и къэрал IуэхущIапIэм и дохутыр нэхъыщхьэ КIэбышэ Валерэ, Налшык дэт поликлиникэ №2»-м и дохутыр нэхъыщхьэ Емуз Маринэ, Iуащхьэмахуэ щIыналъэм и сымаджэщым и дохутыр нэхъыщхьэ Тилов Хьэбибуллэхь, Налшык дэт поликлиникэ №3-м и дохутыр нэхъыщхьэ Дол Маринэ, КъБР-м Уз Iейхэм щеIэзэ и сымаджэщым и дохутыр нэхъыщхьэ Абазэ Азэмэт, нэгъуэщIхэри.

Медицинэ институтым и унафэщIым и къуэдзэ Ачабаевэ ХьэIишэт зэIущIэр къыщызэIуихым КъБКъУ-м и ректорым и къалэнхэр зыгъэзащIэ Алътуд Юрэ и цIэкIэ хьэщIэхэм фIэхъус гуапэ ярихащ икIи утыкум ит щIалэгъуалэр къэрал гъэунэхуныгъэхэм пэлъэщыну ехъуэхъуащ. «Дохутырыр къыхиха IэщIагъэм гурэ псэкIэ бгъэдэтыр пэжмэ, зэпымычу еджэн хуейщ. НыбжьыщIэхэм къапэщылъ къэрал гъэунэхуныгъэхэр апхуэдэ зы лъэбакъуэу къалъытэмэ, шэч хэлъкъым, къайхъулIэнущ, хъарзынэуи пэлъэщынущ. ЩIэныгъэр и пIэ иткъым, абы зэпымычу зеужь, щIэ гуэрхэр къыщIегъэщ. Фэри аращ дызэрыфщыгугъыр – фи пIэм фимыту зывужьыну, зи узыншагъэр дзыхь къыфхуэзыщIыну цIыхубэм фахуэгумэщIэну, зэхэфщIыкIыну, гулъытэ щывмыгъэщIэну, фазэрепсэлъылIэ бзэри, фазэрыбгъэдыхьэ Iэмалхэри щIэныгъэр зи лъабжьэ псалъэ нахуэу щытыну. ФефIэкIуэну си гуапэщ», – жиIащ Ачабаевэм.

ЗэIущIэм къекIуэлIа унафэщIхэр тепсэлъыхьащ зыхуэныкъуэ IэщIагъэлIхэм, лэжьыгъэм теухуауэ лэжьакIуэхэм хуагъэув мардэхэм, IэщIагъэмкIэ зыбужьыну, щIэныгъэм хэбгъэхъуэну щыIэ Iэмалхэм.

Университетым IэнатIэхэм зегъэужьынымкIэ и центрым и унафэщI Куэцэ Ратмир тепсэлъыхьащ КъБКъУ-м бжыгъэрылъанэ IэнатIэхэмкIэ «Факультетус» зыфIаща Центр зэрыщылажьэм. Абы къызэрыхигъэщамкIэ, университетыр къаухауэ лэжьапIэ къэзылъыхъуэхэм Iэмал яIэщ «Факультетус» бжыгъэрылъанэ утыкум илъ анкетэм къигъэув упщIэхэм жэуап ерату резюмер зэбгратыкIыну, зыщагъэлъэгъуэну, яхузэфIэкIхэмрэ IэщIагъэмкIэ яIэ ехъулIэныгъэхэмрэ щагъэлъэгъуэну. «ЖыIэн хуейщ «Факультетус» бжыгъэрылъанэ утыкум гупхэр къызэбгъэпэщу, стартапхэр зэхэпшэу, проектхэм ущелэжьу, IэщIагъэмрэ щIэныгъэмрэ щыхагъахъуэ центрхэм ухыхьэу ущылэжьэну Iэмал зэрыщыIэр. А псори хуэунэтIащ щIалэгъуалэм къыхаха гъуэгум нэхъ щIэх теувэу щхьэж и IэнатIэм зэрыпэрыувэным», - жиIащ Куэцэ Ратмир.

ЗэIущIэр гъэщIэгъуэн дыдэу, уэршэр жыпхъэм иту екIуэкIащ, уеблэмэ лэжьапIэ IэнатIэ етыным теухуа зэгурыIуэныгъэ зэзыщIылIахэри къахэкIащ. Дэри ди гуапэщ ныбжьыщIэхэр гъуэгу махуэ теувэну, къапэщылъ гъэунэхуныгъэхэр къайхъулIэну, зыхуей лэжьапIэри ягъуэтыну.

Апхуэдэу цIыхухэр лэжьапIэ IэнатIэкIэ къызэгъэпэщыным епха Iуэхугъуэхэм ятеухуауэ ущыщIэупщIэ хъунущ КъБКъУ-м и ХъыбарегъащIэ центрым, мы телефонхэмкIи запыпщIэ хъунущ: +7 (8662) 40-48-06.

ШУРДЫМ Динэ.