КъБР-м и Парламентым къыщызэIуахащ «НыбжьыщIэ гвардие» урысейпсо жылагъуэ зэгухьэныгъэм и щIыналъэ къудамэмрэ ЩIалэгъуалэ палатэмрэ ирагъэкIуэкI «Парламентаризмэм и школ» федеральнэ Iуэхур.
ЗИ ныбжьыр илъэс 16 - 30-хэм иту абы хэтыну хуейуэ зыкъэзыгъэлъэгъуа цIыхуи 170-м ящыщу 65-рэ къыхахащ. Нэхъыбэр Къэбэрдей-Балъкъэрым и еджапIэ нэхъыщхьэхэмрэ колледжхэмрэ я студентхэращ. Ахэр ирагъэджэнущ, жылагъуэ-политикэ лэжьакIуэхэм IуагъэщIэнущ, апхуэдэуи республикэм и къулыкъущIапIэхэм я Iуэху къызэгъэпэщыкIэм щыхагъэгъуэзэнущ.
ЩIалэгъуалэм къахуэзащ КъБР-м и Парламентым РегламентымкIэ, депутат этикэмрэ лэжьыгъэр къызэгъэпэщынымкIэ и комитетым и унафэщI Кансаевэ Еленэ, Хабзэр зехьэнымрэ абы тетынымкIэ комитетым и унафэщI Кривко Михаил, ЗаконодательствэмкIэ, къэрал ухуэкIэмрэ щIыпIэ унафэр зегъэкIуэнымкIэ и комитетым и унафэщI Джэш Хьэсэн, ЩIалэгъуалэ палатэм и унафэщI Созаев Кязим, «НыбжьыщIэ гвардие» урысейпсо зэгухьэныгъэм и щIыналъэ къудамэм и унафэщI Абазэ Албэч.
Депутатхэм жаIащ еджапIэм зи щIэныгъэр щыхэзыгъахъуэхэм къэкIуэну зэманым IэмалыфI зэраIэнур республикэм и жылагъуэ-политикэ гъащIэм хэлъхьэныгъэ хуащIыным теухуауэ.
ЗэIущIэм щIалэгъуалэр щыхагъэгъуэзащ КъБР-м и Парламентым и лэжьыгъэмрэ къалэнхэмрэ, къищынэмыщIауэ, я упщIэхэр депутатхэм иратащ. Ахэр щIэупщIащ щIыналъэхэм я парламентхэр зэраухуэ щIыкIэм, жэрдэмхэр къызэрыхалъхьэм, цIыхухэм депутатхэм зыкъызэрыхуагъазэхэр зэрагъэзащIэм, Хэку зауэшхуэм хэтахэм ират дэIэпыкъуныгъэр зыхуэдэм, нэгъуэщIхэми.
«Парламентаризмэм и школыр» мазищым тещIыхьащ. Абы и кIэм нэхъыбэу къыхэжаныкIахэм ящыщ зым Iэмал иIэнущ КъБР-м и Парламентым и депутатым и дэIэпыкъуэгъу хъуну, щыр «НыбжьыщIэ гвардие» зэгухьэныгъэм и штаб нэхъыщхьэм (Москва къалэ) я зэфIэкIым щыхагъэхъуэну ягъэкIуэнущ.
Белгъэрокъуэ Марьянэ.
