КъБР-м щыIэ Къэрал кIуэцI IуэхухэмкIэ министерствэм щызэхэта коллегием къыщапщытэжащ 2021 гъэм и япэ мазищым я лэжьыгъэм кърикIуахэр. Абы хэтащ министерствэм и унафэщIхэмрэ къулыкъущIэхэмрэ.
ЗэIущIэм къыщыхагъэщащ республикэм и оперативнэ щытыкIэм сыт щыгъуи я нэIэ зэрытетар, къагъэсэбэпа Iэмалхэр щхьэпэ хъуащ унэтIыныгъэ щхьэхуэхэм щытыкIэ зэпIэзэрытыр щызэтеIыгъэнымкIэ.
Къэбэрдей-Балъкъэрым нэхъ мащIэ щыхъуащ щIэпхъаджагъэ хьэлъэхэмрэ хьэлъэ дыдэхэмрэ, ауэ а зэманым къриубыдэу хэхъуащ IТ-технологиехэр къагъэсэбэпу ялэжь хьэгъэщагъэхэр.
ЩIэпхъаджагъэхэу сэтей къащIам проценти 4,5-кIэ хэхъуащ. Наркотикхэм пыщIауи нэхъыбэ къыщIагъэщащ. Къызэрыхагъэщащи, зриплъэж мазищым кърикIуахэмкIэ гъуэгу-транспорт къэхъукъащIэхэр процент 20,5-кIэ, абыхэм хэкIуадэхэр процент 27-кIэ, фэбжь хэзыхахэр процент 27,1-кIэ ехащ.
БлэкIа илъэсхэм ялэжьа щIэпхъаджагъэхэр сэтей къэщIынымрэ ахэр зэхэгъэкIынымкIэ яхузэфIэкIам тепсэлъыхьащ КъБР-м щыIэ МВД-м и полицэм и унафэщIым и къуэдзэ, полицэм и полковник Гуэбэшы Хьэмидбий.
Министерствэм къулыкъущIэхэм ядэлэжьэнымкIэ и управленэм и унафэщ, къэрал кIуэцI къулыкъум и полковник Калинин Владимир и псалъэмакъыр тегъэщIат республикэ МВД-м и органхэмрэ къудамэхэмрэ дисциплинэмрэ законностымрэ зэрыщагъэзащIэм, гъэсэныгъэ лэжьыгъэр къызэрыщызэрагъэпэщым.
Апхуэдэуи зэIущIэм гулъытэ щыхуащIащ я лэжьыгъэм и унэтIыныгъэ зэмылIэужьыгъуэхэм ехьэлIа Iуэхухэм.
КъБР-м щыIэ къэрал кIуэцI IуэухухэмкIэ министр, полицэм и генерал-майор Павлов Василий пщэрылъ ящищIащ зэIущIэм къыщаIэта дэтхэнэ зы унэтIыныгъэри пхыгъэкIынымкIэ къалэнхэр.
Зэхыхьэр Iуэху гуапэкIэ иухащ. Зи къалэныр щапхъэ пылъу зыгъэзащIэ, лэжьыгъэм ехъулIэныгъэхэр щызыIэрызыгъэхьа министерствэм и лэжьакIуэ зыбжанэм иратащ Урысей МВД-м, КъБР-м щыIэ МВД-м къабгъэдэкI дамыгъэхэр.