Мы тхыгъэ кIэщIымкIэ фэдгъэцIыхуну Исакъ Заринэ Руслан и пхъур 1995 гъэм щэкIуэгъуэм и 1-м Бахъсэн къыщалъхуащ. Бахъсэн дэт еджапIэ №4-р ехъулIэныгъэкIэ къиуха нэужь, Къэбэрдей-Балъкъэр къэрал университетым медицинэмкIэ и факультетым щIэтIысхьэри, дохутыр IэщIагъэр абы щызригъэгъуэтащ. ИужькIэ ординатурэм псантхуэм еIэзэным щыхуеджащ.
Коронавирус уз зэрыцIалэр зыпкърытхэр щагъэхъуж госпиталу «Дубки» хьэблэм дэтым щылэжьащ Заринэ. А узыр къытпкърыхьэу, Исакъыр здэщыIэ сымаджэщым дыщыщIэхуэм, дэ къыдэпхауэ къыдэIэзар Заринэщ. И ныбжьым хуумыгъэфэщэну гулъытэшхуэ зыхэлъ бзылъхугъэщ ар. ПцIы хэмылъу, япэу дыщыIущIам, тIэкIу дыкъэуIэбжьат, дохутыр цIыкIур тфIэщIалэIуэу. АрщхьэкIэ иужькIэ дэ тлъэгъуащ а цIыхубз псэ къабзэр дохутыр IэщIагъэм къызэрыхуигъэщIар.
АпхуэдизкIэ гумызагъэщ а пщащэ цIыкIури, къыдэIэза къудейкIэ и къалэныр игъэзэщIауэ къилъытэртэкъым. Ар дызэрышхэми къыкIэлъыплъырт. Ерыскъым дигу хуэмыкIуэу дымышхауэ къищIамэ, е тшхар фIэмащIэмэ, ди пIэ лъапэм деж къэтIысырти, езым и IэкIэ къыджьэдилъхьэурэ дигъашхэрт. Ар зэи тщыгъупщэнукъым. ЖытIэ пэтми тхуэухыркъым а цIыхубзым дэтлъэгъуа гуапагъэр.
ПщIэ лей яхуэфащэщ апхуэдэ бын зыгъэса Заринэ и адэ-анэм. ТхузэфIэкIатэмэ, насыпу щыIэмкIэ дыхуэупсэнт а пщащэ гумащIэм.