КIуэкIуэ К. В. республикэм и Прави­тельствэм, муниципальнэ щIыналъэ­хэмрэ къалэ округхэмрэ я уна­фэщIхэм зэIущIэ зыубгъуа ядригъэ­кIуэкIащ ­Урысей Федерацэм и Президент Путин  В. В. «Къэрал социальнэ политикэр гъэ­зэщIэным теухуауэ зэфIэгъэкIыпхъэхэм я IуэхукIэ» 2012 гъэм накъыгъэм и 7-м къыдигъэкIа Указым щыубзыхуахэр зэрагъэзащIэм теухуауэ.

Зытепсэлъыхь Iуэхум теухуауэ док­ладхэр ящIащ КъБР-м лэжьыгъэмрэ цIыхухэр социальнэ и лъэныкъуэкIэ хъу­мэ­нымкIэ и министр Асанов А. У., цIыху-            хэр егъэджэнымкIэ, щIэныгъэмрэ щIа­лэ­гъуалэм я IуэхухэмкIэ министрым и ­къа­лэнхэр зыгъэзащIэ Къумыкъу I. М., ­КъБР-м узыншагъэр хъумэнымкIэ и ми­нистр Хъубий М. Б., КъБР-м щэнхабзэмкIэ и министр Къумахуэ М. Л., КъБР-м эко­номикэ зыужьыныгъэмкIэ и министр Ра­хаев Б. М., КъБР-м финансхэмкIэ и ми­нистрым и къалэнхэр зыгъэзащIэ Лисун  Е. А. сымэ.
Къэрал социальнэ политикэм и IэнатIэм и къалэн нэхъыщхьэу щIыналъэм и уна­фэщIым къыхигъэщащ Урысейм и Пре­зидентым и Указым щыубзыхуахэр текI ямыIэу гъэзэщIэныр, бюджетым къыхэ-кIыу улахуэ зратхэм, псом япэрауэ, егъэ­джэныгъэ, узыншагъэр хъумэн, щэнхабзэ IэнатIэхэм хиубыдэхэм, я лэжьапщIэхэм хэгъэхъуэныр, къащта унафэхэр щIыпIэхэм зэрыщыпхагъэкIым набдзэгубдзаплъэу кIэлъыплъыныр. «Iуэхум убгъурыту уекIуэ­кIын хуейуэ аракъым, атIэ а Iуэхухэр зегъэ­кIуэн икIи абыхэм унафэ ятещIыхьын ­хуейуэ аращ», - жиIащ КъБР-м и Iэтащхьэм и къалэнхэр пIалъэкIэ зыгъэзащIэм.
Лъэпкъ программэхэр, экономикэмрэ социальнэ IэнатIэмрэ я проект хэхахэр гъэ­зэщIэным хуэунэтIауэ республикэм и къэ­рал властым и органхэм я лэжьыгъэр ­тэ­мэму зэкIэлъыгъэкIуа хъун папщIэ, ­къыхигъэщащ КIуэкIуэм, зыхуэфащэ ми­нистерствэхэмрэ IуэхущIапIэхэмрэ я уна­фэщIхэм отчётхэр щащI мыпхуэдэ зэ­IущIэхэр тхьэмахуэм зэ едгъэкIуэкIынущ.