«Гардарика - Кавказ» арт-фестивалыр КъБР-м и Лъэпкъ музейм къыщызэIуахащ. Ар траухуащ Пушкин Александр къызэралъхурэ мы гъэм илъэс 225-рэ, Хэку зауэшхуэм ТекIуэныгъэ Иныр къызэрыщытхьрэ илъэс 80 зэрырикъумрэ.
Мыпхуэдэ фестиваль Кавказым япэу ирагъэкIуэкIыу аращ. Санкт-Петербург и музейхэм я лэжьакIуэхэм Налшык къаша лэжьыгъэхэрщ музейм щагъэлъагъуэр. 1901 гъэм щыщIэдзауэ Урысейм и сурэтыщI 70-м я Iэдакъэ къыщIэкIа лэжьыгъэ 500-м щIигъу накъыгъэм и 16 пщIондэ Лъэпкъ музейм щагъэлъэгъуэнущ. Абыхэм я нэхъыбэр цIыху щхьэхуэхэм зэхуахьэсауэ яхъумэхэм ящыщщ. Языныкъуэхэр япэу утыку щагъэлъагъуэу аращ. Урысейм, Кавказ Ищхъэрэм, хамэ къэралхэм ящыщ художникхэм я лэжьыгъэхэр къызэщIеубыдэ абы. Ди республикэм и сурэтыщIхэу Ахъмэт Лиуанрэ Сарбашев Азноррэ я Iэдакъэ къыщIэкIаи яхэтщ абыхэм. Сурэт, графикэ лэжьыгъэхэм къадэкIуэу ятIэ гъэжьам къыхэщIыкIа хьэпшыпхэр, скульптурэхэр ягъэлъагъуэ.
КъБР-м щэнхабзэмкIэ и министрым и къуэдзэ Карчаевэ Iэминэ и псалъэм къыхигъэщащ сурэт гъэщIэгъуэнхэр щызэхуэхьэса выставкэ купщIафIэр зыхуэбгъадэ хъун зэрыщымыIэр. Абы къыхигъэщащ «Гардарика» цIэр щэнхабзэр щыбей, творческэ щхьэхуэныгъэхэр, IэпщIэлъапщIэхэр зиIэ къалэ куэд къызэщIэзыубыдэ Урысейм нэхъапэм и фIэщыгъэу зэрыщытам къызэрытекIар. Карчаевэм фIыщIэ яхуищIащ фестивалыр къызэзыгъэпэщахэм икIи жиIащ зэдэлэжьэным дяпэкIи пащэну зэрыщыгугъыр.
- Гуапэщ Налшык мыпхуэдэ выставкэ къызэрыщызэIуахар! Гъуазджэр фIыуэ зылъагъухэр мы лэжьыгъэ телъыджэхэм музейм къызэрыришэлIэнум шэч хэлъкъым! Мыпхуэдэ Iуэхухэр ди республикэм и щэнхабзэмрэ гъуазджэмрэ зезыгъэужьщ! - жиIащ КъБР-м и Парламентым щэнхабзэмрэ хъыбарегъащIэ IэнатIэхэмкIэ и комитетым и унафэщI Къумал Заурбэч.
КъБР-м и цIыхубэ сурэтыщI Жылэ Анатолэ и псалъэм къыхигъэщащ гъэлъэгъуэныгъэм зи лэжьыгъэхэр хагъэхьа сурэтыщIхэм щхьэж я дуней лъагъукIэрэ гупсысэкIэрэ яIэжми, дэтхэнэ гъуазджэ сурэтри зэрыщIэщыгъуэр.
- Iуэхур япэщIыкIэ къыщызэдгъэпэщащ ди Эрмитажым и къудамэу Выборг щыIэм. Абы Урысейм и къалэ цIыкIухэм къыщыпытщэну дыубзыхуащ, зи лэжьыгъэхэр щIыналъэ зэмылIэужьы-
гъуэхэм щызыгъэлъагъуэ художникхэм папщIэ, - жиIащ Кирилловэ Риммэ. - НэгъуэщI къалэхэми выставкэр тшэну ди мурадащ, ауэ Налшык нэхъ дигу дыхьэри дыкъыщыувыIащ!
Зэхыхьэр къызэзыгъэпэщахэм ящыщ Пинежаниновэ Еленэ «Гардарика» арт-фестивалым зыкърезыгъэхьэлIахэр щигъэгъуэзащ абы и тхыдэ дахэм. Еленэ зэрыжиIамкIэ, зи лэжьыгъэ ягъэлъагъуэ языныкъуэ художникхэм лIакъуэ-лIакъуэкIэрэ а IэщIагъэм пащэ. Урысейм и мызакъуэу, хамэ къэралхэм щыпсэу сурэтыщIхэми я лэжьыгъэхэр къашащ. Санкт-Петербург къикIа хьэщIэхэм я мурадщ мастер-классхэр, зэхыхьэхэр, лекцэхэр ирагъэкIуэкIыну.
БЖЬЫХЬЭЛI Розэ. Сурэтыр Къарей Элинэ трихащ.
