Алимле, тинтиулерини эсеплерине таянып, бюгюнлюкде жыл санлары 40-гъа, 50-ге, 55-ге жетгенле уллайгъан  кезиулерине 75-80 жылларында кирликлерин айтадыла. Бизни ата-аналарыбыз бла тенлешдиргенде, ала  жашаудан 25 жылны «къытадыла». Бу  шарт бла байламлы къаллай оюмла келедиле акъылыма.

Черек районда «Къашхатау» спорт арада эркин тутушуудан эки кюнню ичинде битеуроссей эришиу бардырылгъанды, ол СССР-ни спортуну устасы Оракъланы Харунну хурметине аталып къуралгъанды.

Къабарты-Малкъарны Курортла эм туризм министерствода ведомствону башчысы Мурат Шогенцуков белгили журналист, «Союз къырал» эм «Союз вече» изданияланы келечиси Валерий Чумаков бла тюбешгенди. Ала ушакъларында энчи эс туризмни эм саулукъ кючлеу сфераны айнытыугъа бёлгендиле.

Къабарты-Малкъар къырал аграр университетни «Эл мюлкню механизациясы» факультетинде олимпиада ётгенди. Анга къатышхан студентле эл мюлк техниканы нечик иги билгенлерин кёргюзтгендиле.

«Иш кёллю Россей» жамауат организацияны Къабарты-Малкъарда бёлюмю «Санкцияла кийирилген сагъатда бизнес» деген темагъа «тёгерек стол» къурагъандыла. Ол «Синдика» къонакъ юйде кёп болмай ётгенди.

Къабарты-Малкъарда Кадастр палатаны специалистлери озгъан тогъуз айны ичинде неллай бир электрон выписка бергенлерини, жеринден тепдирилмеген мюлкню юсюнден аны къайда алыргъа боллугъуну эмда алай этерча не зат керегини юсюнден айтхандыла ведомствода.

Битеуроссей халкъ фронтну Къабарты-Малкъарда бёлюмюню келечилери, республикадан предпринимательлени себепликлери бла Украинадан къачып келген кёп сабийли юйюрлеге болушлукъ этгендиле.

Быллай билдириуню налог органла адамлагъа жыл сайын жибередиле. Быйыл анда озгъан жыл ючюн тёлеуле боллукъдула: транспорт, жер эмда мюлк ючюн. Ары дери тыйылмагъан эсе, НДФЛ да берирге тюшерикди.

Нальчикни 1-чи автовокзалыны тийресинде къутхарыучуланы от тюшюуге къажау – амаллагъа юйрениулери болгъандыла.  Ёртенни  ёчюлтюу жаны бла бёлюмню башчысыны орунбасары Салим Люев къарауулла бла жараула ётдюргенди.

Шимал-Кавказстатдан билдиргенлерича, биринчи октябрьни эсеплерине кёре, Къабарты-Малкъарны мюлклерини барында да 15,3 минг гектардан 264,8 минг тонна тахта кёгет жыйылгъанды. Былтыр бу заман бла тенглешдиргенде, ол 32 процентге кёпдю.