Къабарты-Малкъарны Курортла эм туризм министерствода ведомствону башчысы Мурат Шогенцуков белгили журналист, «Союз къырал» эм «Союз вече» изданияланы келечиси Валерий Чумаков бла тюбешгенди. Ала ушакъларында энчи эс туризмни эм саулукъ кючлеу сфераны айнытыугъа бёлгендиле.

Министр адамланы солууларын къурауда къаллай жетишимле болгъанларыны, туристлени жумушларына къараучу качествосуну, регионну ариу жерлерини юсюнден билдиргенди. 

Тюбешиуню эсеплерин чыгъара, Мурат Шогенцуков республика Беларусь бла ахшы байламлыкъла Совет Союзну жылларында да жюрютгенин белгилегенди. «Тауланы сюйгенле Кавказны, анда къуралгъан сейирлик жолоучулукъла, жайда таулагъа ёрлеу, къышда лыжалада учуу бла шагъырейдиле. Мен оюм этгенден, жаш тёлю къыралланы туризм жаны бла онгларын иги билмейди, бу жаны бла борчлу халда ишлерикбиз», - дегенди ол.

Кульчаланы Зульфия