Тюнене  видеоконференцсвязь халда Россей Федерацияны  табийгъат байлыкъла эмда экология министри Д.Н. Кобылкинни башчылыгъында тийрелени  къар юзюлюуледен сакълау ишлени Къабарты-Малкъарны бла Къарачай-Черкесни  власть органлары къалай хазырлагъанлары эм бардыргъанлары бла байламлы кенгеш къуралгъанды. Аны ишине КъМР-ни Башчысыны къуллугъун болжаллы халда толтургъан К.В. Коков къатышханды.
Анда жамауатны эмда инфраструктура объектлени табийгъат болумланы къыйынлыкъларындан сакълау, къоркъуусузлукъну жалчытыу вопросла сюзюлгендиле. Республикабызда къар юзюлюрге 132  къоркъуулу участок белгилиди.  Ол жерледе къарны къалынлыгъына контроль тенгизден 3040 эмда 2125 метр бийикликде орналгъан «Чегет» бла «Терскъол» метеостанциялада бардырылгъанды. Аны бла бирге  къар юзюлюуге къажау ишлени финанс жаны бла жалчытыу вопросла мындан арысында да энчи эс бёлюуню излейдиле.