Бзылъхугъэ гуэрым и сабийм увыIэгъуэ имыIэу фошыгъу ишхын фIэфIти, хузыхегъэныртэкъым. ИкIэм-икIэжым я къуажэм дэс лIыжь Iущым деж кIуащ, ечэнджэщыну. КъызытекIухьар хуиIуэта нэужь, лIыжьым къыжриIащ етIуанэ махуэм и къуэр здишэу кIуэну. Бзылъхугъэм и къуэр ишащ. 
«Апхуэдизу пфIэфIу ара IэфI пшхыну?» - еупщIащ лIыжьыр щIалэ цIыкIум. Мыдрейми абы жиIам щыхьэт техъуэу, и щхьэр ищIащ. Тхьэмахуэ дэкIмэ, къытрагъэзэну аргуэру къажриIэри, къригъэжьэжащ. Тхьэмахуэ нэужьми апхуэдэ дыдэу еупщIащ. Ещанэуи апхуэдэ дыдэу еупщIу, щIалэ цIыкIум жэуап къыщритым:
- Сэри IэфIкIэ сыерыщщ. Ауэ абы зэраныгъэ куэд къызэришэр уи фIэщ щIы. Уэри апхуэдиз IэфI умышх, - иущиящ лIыжьым сабийр. 
Бзылъхугъэм къыгурыIуакъым лIыжьым Iэмал гуэр къыщIимыгъуэтар. Ауэ гу лъитащ лIыжьым и ущиер зыхилъхьэу, и къуэм фошыгъу шхыныр зэрыщигъэтам. 
Бзылъхугъэр нэхъыжьым и деж кIуэри фIыщIэ хуищIащ.
- Уи чэнджэщыр зэрызыхилъхьэнур пщIэрэ пэт, зыри жумыIэу щхьэ къытедыбгъэгъазэрэт? - фIэгъэщIэгъуэну щIэупщIащ ар. 
- Япэу уи щIалэ цIыкIур къыщысхуэпшам, сабийм и дагъуэ дыдэр сэри схэлът - IэфIкIэ сыерыщт. ТхьэмахуэкIэ ар зыхэзну, сабийми сепсэлъэн си гугъами, а пIалъэм схузыхэнакъым. 
 Ещанэу фыкъыщыкIуам си дагъуэр IэщIыб сщIати, сабийм сеущиенуи хуит сыхъуат, - къитащ жэуап лIыжьым.
 
Гугъуэт Заремэ.