Урысейм ис лъэпкъхэм я щэнхабзэ хъугъуэфIыгъуэхэм я илъэсым хыхьэу, Мэлбахъуэ Тимборэ и цIэр зезыхьэ Къэрал лъэпкъ библиотекэм къыщызэрагъэпэщащ «Родной мой край - Чувашия» тхылъ дапхъэр. Ар ирагъэхьэлIащ республикэм щыпсэу чувашхэр зэкъуэзыгъэувэ «Нарспи» лъэпкъ щэнхабзэ центрыр къызэрызэрагъэпэщам.

Чувашхэм я лъэпкъ щэнхабзэ центр республикэм щыIэным теухуа жэрдэмыр жылагъуэ лэжьакIуэ Черновэ Алёнэ къыбгъэдэкIащ, щIыналъэм щыпсэу лъэпкъхэм я бжыгъэр къыхатхыкIа нэужь. КъБР-м ЩэнхабзэмкIэ и фондым, Вэрокъуэ Владимир и цIэр зезыхьэм, щолажьэ республикэм ис лъэпкъхэм я щэнхабзэ центру 12.

- Къэбэрдей-Балъкъэрым си лъэпкъэгъу исрэ имысрэ зэзгъэщIэну яужь сихьащ икIи сыщIэупщIэурэ къэслъыхъуэу щIэздзащ. Зэман кIэщIым къриубыдэу зыбжанэ къыщызгъуэтым, дызэгурыIуэри дызэхуэсащ. Абы унафэ щытщIащ чувашхэм я лъэпкъ щэнхабзэ центр республикэм къыщызэдгъэпэщыну, ди лъэпкъ IуэрыIуатэм къыхэщ бзылъхугъэм - Нарспи - и цIэри абы фIэтщыну, - жеIэ Черновэм. - Лъэпкъ библиотекэм чуваш литературэ-IуэрыIуатэ гъэлъэгъуэныгъэр къыщызэIуахащ украинхэм я «Днипро» щэнхабзэ центрым и унафэщI Харенкэ Светланэ и фIыгъэкIэ. Библиотекэм и фондым чуваш тхакIуэхэмрэ усакIуэхэмрэ я тхылъ, щIэныгъэ-публицистикэ литературэ куэд къыщыдгъуэтащ, ди лъэпкъым къыхэкIа цIыху цIэрыIуэхэм, абыхэм я щыIэкIэ-псэукIэхэм ехьэлIауэ.

Тхылъ фIыуэ зылъагъухэм я Къэбэрдей-Балъкъэр зэгухьэныгъэм и унафэщI Шинкарёвэ Наталье зэхыхьэм зыкърезыхьэлIахэм ягу къигъэкIыжащ ди щIыналъэм лъэпкъ зэмылIэужьыгъуэу 190-м щыщхэр зэгурыIуэрэ зэдэIуэжу зэрыщыпсэур, чувашхэм творческэ зэпыщIэныгъэ быдэ зэрыхуаIэр.

Черновэ Алёнэ зыубгъуауэ къытеувыIащ чувашхэм я тхыдэм, къадекIуэкI хабзэ дахэхэм, я къэрал дамыгъэхэм.

ЗэIущIэм хэтащ «Нарспи» щэнхабзэ центрым щыщхэу Петровэ Алинэ, Устиновэ Маринэ, Черновэ Алёнэ, Мизинэ Ларисэ, Дьяченкэ Маргаритэ, республикэм и жылагъуэ зэгухьэныгъэхэм я лIыкIуэхэр.

ТЕКIУЖЬ Заретэ.