Бэрбэч ХьэтIутIэ и цIэр зезы- хьэ Къэбэрдей-Балъкъэр къэрал университетыр ди республикэм и мызакъуэу, Урысей Федерацэ псом я щIэныгъэ икIи егъэджэныгъэ центр пашэхэм ящыщщ. ЩIэныгъэ-къэхутэныгъэ лъэщ-хэр щрагъэкIуэкI, егъэджэны- гъэ-гъэсэныгъэ лэжьыгъэ купщIафIэ щызэфIах IуэхущIапIэр къызэрызэрагъэпэщрэ илъэс 90, ар зи лъабжьэу къызэIуаха университетыр илъэс 65-рэ ирокъу мы гъэм.
А махуэшхуэхэр Iэтауэ зэрагъэлъэпIэну щIыкIэхэм ятеухуа зэхуэс иджыблагъэ щекIуэкIащ КъБКъУ-м. Абыхэм епха дауэдапщэхэр къызыхуэтыншэу къызэгъэпэщыныр, егъэкIуэкIыныр зи пщэрылъ ГъэзэщIакIуэ гуп щыхахащ зэхуэсым. Университетым и къудамэ псоми я лIыкIуэхэр зыхэт гупым и пашэщ КъБКъУ-м и проректорым и къалэнхэр зыгъэзащIэ ГъукIэпщокъуэ Мурат.
Ди республикэм и еджапIэ нэхъыщхьэхэм я пашэ КъБКъУ-м къикIуа тхыдэ гъуэгуанэм теухуа доклад купщIафIэ щащIащ зэхуэсым. ИпэжыпIэкIэ, Къэбэрдей-Балъкъэрым и цIыхубэм я дежкIэ мыхьэнэшхуэ зиIэ Iуэхугъуэт ди щIыналъэм еджапIэ нэхъыщхьэ къыщызэIухыныр. ЩIыналъэм игъуэта социально-экономикэ щытыкIэмрэ абы егъэджэныгъэмрэ щIэныгъэмрэ зэрызыщаужьамрэ япкъ иткIэ, ди щIыпIэм еджапIэ нэхъыщхьэ иIэныр Iэмалыншэ Iуэху хъуат. ЩытыкIэр къалъытэри, РСФСР-м и Правительствэм 1932 гъэм и мэлыжьыхьым унафэ къищтауэ щытащ Къэбэрдей-Балъкъэрым пединститут щхьэхуэ къыщызэIухыным теухуауэ.
Пединститут къызэIуахын ипэкIэ ди лъэпкъ IэщIагъэлIхэр щагъэхьэзыру щытар Орджоникидзе (иджы Владикавказ) дэта Бгырыс пединститутырт. КъБКъПИ-м япэ студентхэм папщIэ и бжэр къызэIуихащ 1932 гъэм фокIадэм и 15-м. Студенти 100 щеджэрт абы и къудамищым: биологие, физико-математикэ, литературэ факультетхэм. Ахэр щIэныгъэм и гъуэгум трашэрт егъэджакIуэ 13-м, профессоритIрэ доцентитIрэ яхэту. Нэхъ иужьыIуэ-кIэ къызэрагъэпэщащ тхыдэмкIэ, естественно-географиемкIэ, бзэмкIэ къудамэхэр. Зэрылэжьа илъэсхэм къриубыдэу институтым егъэджакIуэ 4200-рэ игъэхьэзыращ. Ар Кавказ Ищхъэрэм и еджапIэ нэхъыфIхэм хабжэу щытащ.
ЛIэщIыгъуэ блэкIам и 50 гъэхэм ди къэралым щекIуэкIа щIэныгъэ-техникэ революцэм къигъэува къалэнхэм ящыщт зызыужь экономикэр зыхуэныкъуэ IэщIагъэлIхэр гъэхьэзырыныр. 1956 гъэм и бадзэуэгъуэ мазэм КъБАССР-м и Министрхэм я Советым СССР-м и унафэщIхэм я деж игъэхьауэ щытащ Къэбэрдейр Урысейм зэрыгухьэрэ илъэс 400 зэрырикъур республикэм щыгъэлъэпIэн зэрыхуейм теухуа тхылъ, абы ирихьэлIэу гъэзэщIапхъэу къалъытэхэр иту. А тхылъым щхьэхуэу къыщыгъэлъэ- гъуат пединститутыр къэрал университет щIыжын зэрыхуейм теухуа жэрдэмри. Нэрылъагъут зызыужь лъэпкъ экономикэмрэ жылагъуэмрэ апхуэдэ зэхъуэкIыныгъэ зэрыхуэныкъуэр.
Ар фIы дыдэу къызыгурыIуэт гъащIэм и бэуэкIэр псэкIэ зыхэзыщIэу щыта политик Iэзэ, еджагъэшхуэ Бэрбэч ХьэтIутIэ. Абы къилъытэрт Къэбэрдей-Балъкъэрым езым и къэрал универси-тет иIэжыпхъэу. Бэрбэчым и Iуэху еплъыкIэр къыдэзыIыгъхэри мащIэтэкъым. Лъэпкъ интеллигенцэм щыщ щIэныгъэлIхэр, IэщIагъэлIхэр мызэ-мытIэу тхащ щIыналъэ, къэрал унафэщIхэм я деж, Бэрбэчым къыхилъхьа жэрдэмыр зэрыIэмалыншэ Iуэхур къыхагъэщу.
1957 гъэм мэлыжьыхьым и 5-м СССР-м и Министрхэм я Советым унафэ къищтащ Къэбэрдей пединститутыр и лъабжьэу ди республикэм Къэбэрдей-Балъкъэр къэ-рал университет къызэрыщызэIуахым теухуауэ. РСФСР-м и Министрхэм я Советми а зэман дыдэм унафэ ищIащ Налшык мэкъумэш техникумым и унэр, общежитыр, еджапIэм и мылъку-техникэ базэр псори КъБКъУ-м етын хуейуэ. Куэд дэмыкIыу нэгъуэщI зы укази къаIэрыхьащ республикэм и унафэщIхэм: «Къэбэрдей-Балъкъэр къэрал университетым и ректору гъэувын тхыдэ щIэныгъэхэм я кандидат Бэрбэч ХьэтIутIэ МутIэ и къуэр», - иту.
Бэрбэчым игъэтIылъащ университетым и егъэджэныгъэ-щIэныгъэ лъабжьэ быдэр. Нобэ а еджапIэм зыIэригъэхьэ ехъулIэныгъэхэми я къежьапIэ пэж хъуащ абы щыгъуэ яубзыхуа Iуэху зехьэкIэр. Илъэс зэхуэмыдэхэм университетым и ректору щытащ КIэрэф Къамболэт, Лъостэн Владимир, Къарэмырзэ Барэсбий. Дэтхэнэ зыми хузэфIэкI гуащIэ хилъхьащ абы и зыужьыныгъэм. Мы зэманым абы и унафэщIщ техникэ, экономикэ щIэныгъэхэм я доктор, профессор Алъ-туд Юрэ. А еджагъэшхуэм и унафэм щIэту КъБКъУ-р ирокIуэ зыужьыныгъэм, ехъулIэныгъэм я гъуэгум. Ар Урысей Федерацэм и щIэныгъэ-егъэджэныгъэ центр пашэхэм ящыщщ. Абы щолажьэ IэщIагъэлI 1950-рэ, щIэныгъэ щызрагъэгъуэт ди къэралым и щIыналъэ 41-м, хамэ щIыпIэу 43-м щыщ студент 17000-м нэсым. Университетым и къудамэхэм щыхурагъаджэ IэщIагъи 100-м щIигъум. ЕджапIэ нэхъыщхьэр къэзыухахэм къахэкIащ Урысей Федерацэм, хамэ щIыналъэ куэдым цIэрыIуэ щыхъуа щIэныгъэлIхэр, егъэджакIуэхэр, инженерхэр, хабзэубзыху, гъэзэщIакIуэ властыр зыIэщIэлъ къэрал къулыкъущIэхэр, хьэрычэтыщIэ лъэрызехьэхэр. ЩIэныгъэ щрагъэгъуэт еджапIэ нэхъыщхьэхэм Интерфаксым и RAEX IэнатIэхэм щрагъэкIуэкIа лъэпкъ рейтингым къызэригъэлъэгъуамкIэ, КъБКъУ-р хохьэ апхуэдэ IуэхущIапIэ нэхъыфIи 100-м.
ГъукIэпщокъуэм къызэрыхигъэщамкIэ, махуэшхуэм зэрызыхуагъэхьэзыр Iуэхугъуэхэм хиубыдэу, а псори зэрыт тхылъхэр, альбомхэр, буклетхэр къыщыдэкIынущ ди щIыналъэм. КъБКъУ-м бгъэдэлъ зэфIэкI лъагэхэм, щIэныгъэлI цIэрыIуэхэм апхуэдэ щIыкIэкIэ адэкIи щыгъуазэ хуэщIыпхъэщ цIыхухэр, абы и пщIэр хуэфэщэну къыщыIэтыпхъэщ ди республикэми, Урысей Федерацэми, хамэ къэралхэми.
ЖЫЛАСЭ Маритэ.