«Жашау журтла эмда шахарда болум» миллет проектге кирген «Тап шахар болум къурау» деген къырал программаны чеклеринде былтыр Къабарты-Малкъарда кёп къалмай токъсан арбаз бла 34 жамауат тийре жангыртылгъанды. Проектни тамамлаугъа 40 муниципалитет къатышханды, деп билдиргендиле КъМР-ни Къурулуш эмда жашау журт-коммунал мюлк министерствосундан.

Аслам жамауат болуучу жерлени юсюнден айтханда, битеуда он сквер, тёрт парк, онбеш майдан, жаяу жюрюгенлеге эки тийре эмда бир орам къуралгъанды неда жангыртылгъанды. Министр Алим Бербеков белгилегеннге кёре, «бу иш шахар адамлагъа къайтарылып башланнганыны белгисиди дерге боллукъду. Ала быллай жерледе тохтайдыла, кечинедиле, башхала бла тюбешедиле - къалай болсада хайырланадыла. Бир игиси уа – ары жангыдан къайтып келедиле».

Алай бла министр быллай жерлени жангыртыугъа бийик магъана бергенди, быйыл да бу иш андан ары бардырыллыгъын чертгенди.

Улбашланы Мурат хазырлагъанды.