Нальчикде  Идаров эм Малкъар орамлада  улоу тохтаучу онеки комплекс къуралгъанды.  Мындан арысында да шахарда эски остановкаланы орунуна бюгюннгю излемлеге келишген майданчыкъла жарашдырыллыкъдыла. Аны юсюнден бизге мэрияны пресс-службасындан билдиргендиле.

Малкъар орамда эки жангы павильон жарашдырылгъанды. Ала къурамларына кёре Ленин атлы проспектледен башха тюйюлдюле. Хар бирини камерасы,  Wi-Fi эм кече жарытхан реклама конструкциясы  да бардыла.

Идаров орамда уа «Россей бла ёмюрлеге» аркадан «Вольный Ауул» микрорайоннга дери он  комплекс алышыннганды. Ала да башха орамлада объектлеге келишедиле. Комплекслени  алларында бордюрланы эм плитканы да жангыртып, омакъ этгендиле.

Саулай алып айтханда, быйыл Дагъыстан, Семашко, Хмельницкий, Идаров, Малкъар, Профсоюз, Канукоев, Шогенцуков орамлада, Шогенцуковдан Кировха дери 35 комплекс ишленнгенди. Жылны ахырына энтта да Осипенко, Катханов, Ашуров эм Неделина орамлада да аланы алышыр мурат этиледи. 

Тийишли ишле  «Къоркъуусуз эм качестволу автомобиль жолла» миллет проектге кёре бардырыладыла.

Магометланы Сулейман.