Краснодар шахарда бардырылгъан InterFood Krasnodar кёрмючге Къабарты-Малкъардан юч предприятие эмда предприниматель къатышхандыла, деп билдиргендиле республикада «Мени бизнесим» арадан. Анда кеслерини продукцияларын Чегемде мияла завод, «Фрутопьяно» предприятие эмда энчи предприниматель Аслан Безиров кёргюзтгендиле.

Сагъынылгъан заводда мияладан шешала, тюрлю-тюрлю орунла, медицинада хайырланылгъан абериле чыгъарадыла. Анда производство айный барады, быйыл кесинде да жангы бёлюм ачыллыкъды. «Фрутопьяно» предприятияда жемишледен татлы ашарыкъла жарашдырадыла. Энчи предприниматель а «EcoJam» деген ат бла варенияла бла джемле чыгъарыу бла кюрешеди.

InterFood Krasnodar къыралны къыбыла жанында эм уллу, сора аслам адам келиучю кёрмючге саналады. Ары сатыу-алыу сетьлени, HoReCa сферада предприятияланы башчылары бла келечилери да къатышадыла.

«Къабарты-Малкъардан предприятияланы продукцияларына бизни къыралда рынокда сурам игиди. Анда аланы хар бири да кесини жерин тапханды. Быллай магъаналы кёрмючлеге къатышыу алагъа не жаны бла да хайырлыды: анда къыйматлы байламлыкъла къураргъа, келишимле этерге, сатыу-алыуну айнытыргъа аламат онгла чыгъадыла», - дегенди Къабарты-Малкъарны Экономиканы айнытыу министерствосуну социал-экономика реформала департаментини башчысы Ольга Белецкая.

Улбашланы Мурат хазырлагъанды.