Кёп болмай КъМР-де сабийни эркинликлери жаны бла уполномоченный Светлана Тлинова Черек районда тюбешиу бардыргъанды. Аны аллында уа муниципалитетни администрациясыны башчысы Къулбайланы Алан бла тюбешип, сабийлени эркинликлерин къоруулау жаны бла болумну сюзгенди эм бу жаны бла байламлыкъда тири ишлерге чакъыргъанды. Ол санда сабийлерине алиментле тёлеуден албугъартханла бла тюбешиуле ётдюрюрге кереклиси да айтылгъанды.
Ол кюн Светлана Тлинова бла тюбешиуге келгенлени асламысыны жарсыулары акъылбалыкъ болмагъанланы жашау болумларын игилендириу бла байламлы эдиле. Сабий омбудсмен алагъа законну ангылатханды, магъаналы эсгертиуле да этгенди. Ол районну администрациясыны башчысыны орунбасары Эфендиланы Тарезагъа, акъылбалыкъ болмагъанланы ишлери жаны бла комиссияны эм полицияны келечилерине да сабийлени сейирлери сакъланырына аслам эс бурургъа кереклисин айтханды. Ол санда къыйын болумда жашагъанланы, сабийлерине уллу кёллюлюк этген ата-аналаны, опекунланы эм башхаланы тинтип, тийишли мадар этерге кереклисин эсгертгенди. Бу жаны бла тийишли органла кючлерин бирикдирмей жарамазлыгъын да чертгенди.
Магометланы Сулейман.