КъБР-м и Парламентым и УнафэщI Егоровэ Татьянэ иригъэкIуэкIа зи чэзу зэIущIэм депутатхэр Iуэхугъуэ 40-м щIигъум щытепсэлъыхьащ.

Абыхэм ящыщщ «Къэбэрдей-Балъкъэр Республикэм псэупIэ Iуэхухэр зэры­щрагъэкIуэкIым теухуауэ» КъБР-м и Законым и Iыхьэ 22-2-м зэхъуэкIыныгъэхэр хэлъхьэным ехьэлIауэ» КъБР-м и зако­ным и проектыр.
КъБР-м и Парламентым УхуэныгъэмкIэ, псэупIэ-коммунальнэ IэнатIэмрэ гъэсы­ныпхъэ-энергетикэ IуэхущIапIэмкIэ и комитетым и унафэщI Гриневич Валерий жиIащ федеральнэ закон №558-ФЗ-м къызэрыщыгъэлъэгъуамкIэ, къэрал псэу­пIэ кIэлъыплъыныгъэхэр къызэзыгъэпэщ IуэхущIапIэхэм я къалэнхэм дыщIагъуащ фэтэр куэду зэхэт унэм и пэшхэр зэрау­хуауэ щытам къыщхьэщыкIыу зэхъуэ­кIыныгъэхэр щыхалъхьэкIэ (къэрал къу­лыкъущIапIэхэм, щIыпIэ самоуправленэм и органхэм, IуэхущIапIэхэм, хьэры­чэтыщIэхэм, цIыхухэм) ныкъусаныгъэ ялэжьмэ, къыщIагъэщыну е къызэпаудыну. ПсэупIэ кIэлъыплъыныгъэмкIэ къэ­рал, муниципальнэ IэнатIэхэр а хабзэм ­хуит ещI фэтэр куэду зэхэт унэм и пэшхэм я ухуэкIэр мардэхэм къемызэгъыу зэра­хъуэжам теухуауэ хъыбар къаIэрыхьэмэ, зэуэ къэпщытэныгъэхэр ирагъэкIуэкIыну.
Апхуэдэуи хэплъэн щIадзащ «ЦIыхухэм я узыншагъэр хъумэныр къызэгъэпэ­щыным теухуауэ» КъБР-м и Законым и Iыхьэ 2-м зэхъуэкIыныгъэхэр хэлъхьэным и IуэхукIэ» КъБР-м и законым и проектым.
Зи гугъу тщIа законопроектхэр ящыщщ КъБР-м и Парламентыр 2019 гъэм и гъатхэ зэхыхьэм зэлэжьыну Iуэхугъуэ нэхъыщхьэхэм икIи ахэр хуагъэхьащ зыхуэфащэ IуэхущIапIэхэр хагъэплъэну.
Депутатхэр тепсэлъыхьащ КъБР-м и Парламентым ЗаконодательствэмкIэ, къэ­рал ухуэкIэмрэ щIыпIэ унафэр зегъэ­кIуэнымкIэ и комитетым игъэхьэзыра «Урысей Федерацэм и щIыналъэхэм я къэрал, хабзэгъэув IуэхущIапIэхэм ятеу­хуауэ» Федеральнэ законым и 21-нэ Iы­хьэм зэхъуэкIыныгъэхэр хэлъхьэным ехьэ­лIауэ» федеральнэ хабзэм и проектым.
КъБР-м и Парламентым ЗаконодательствэмкIэ, къэрал ухуэкIэмрэ щIыпIэ унафэр зегъэкIуэнымкIэ и комитетым и унафэщI Мэлбахъуэ Борис зэрыжиIамкIэ, законопроектыр хуэгъэзащ «Урысей Федерацэм и щIыналъэхэм я къэрал, хабзэгъэув IуэхущIапIэхэм ятеухуауэ» Федеральнэ законым и 21-нэ Iыхьэм и положенэр Урысей Федерацэм и суд ухуэкIэр щыгъэбелджыла федеральнэ закон хэхахэм я мардэхэм зэрезэгъыр къэхутэным, Урысей Федерацэм и щIыналъэхэм я конституцэ судхэм хеящIэхэм я къалэнхэр щызыгъэзащIэхэмрэ зэзыгъэкIуж хеящIэхэмрэ (къэрал къулыкъуу щытыр) я статусыр къэгъэлъэгъуэным.
Хабзэ жэрдэму депутатхэм ягъэхьэзыращ «Гъунапкъэ зэдэлэжьэныгъэм теухуауэ» Федеральнэ законым и 12-нэ Iы­хьэм зэхъуэкIыныгъэхэр хэлъхьэным теухуауэ» федеральнэ законым и проектыр.
ЗэIущIэм и кIэм КъБР-м и Парламентым Мэкъумэш политикэмкIэ, щIыуэпсыр хъумэнымрэ къэгъэсэбэпынымкIэ, щIы IуэхухэмкIэ и комитетым и унафэщI Щхьэгъэпсо Сэфарбий депутатхэм хъыбар ­гуапэ яжриIащ «КъБР-м и Тхылъ плъы­жьыр» къызэрыдэкIам теухуауэ. Тхы­лъыр щагъэхьэзырым депутатхэм зэпы­мыууэ абы я нэIэ трагъэтащ.