ЩIэныгъэлI, тхакIуэ, тхыдэдж МафIэдз Сэрэбий къызэралъхурэ илъэс 84-рэ щрикъум ирихьэлIэу а лIы щэджащэм и фэеплъ пхъэбгъу дыгъуасэ къыщызэIуахащ ар щыпсэуа, Налшык къалэ дэт унэм.
А Iуэхум кърихьэлIат КъБР-м и Парламентым, Правительствэм я лIыкIуэхэр, щIэныгъэрылажьэхэр, МафIэдзым и ныбжьэгъухэр, благъэ-Iыхьлыхэр, и творчествэр фIыуэ зылъагъухэр.
Лъэпкъ литературэм, тхыдэм, IуэрыIуатэм, егъэджэныгъэм хэмыгъуэщэжын лъагъуэ щыпхызыша Сэрэбий теухуауэ псалъэ дахэ куэд щыжаIащ пэкIум.
КъБР-м щэнхабзэмкIэ и министр Къумахуэ Мухьэдин къыщыпсалъэм жиIащ, иужьрей зэманым хабзэ дахэ хъуауэ, лъэпкъым хуэлэжьа цIыху щэджащэхэр зэрагъэлъапIэр, иджырей зэхыхьэри абы и зы щапхъэу къэпхь зэрыхъунур.
- Сэрэбий щIэныгъэмрэ этнографиемрэ хуищIа хэлъхьэныгъэм и закъуэкъым и цIэр жыжьэ зыгъэIуар. Ар цIыху хьэлэмэтыщэу, акъыл куу зиIэ адыгэлIу щытащ. Абы и псэм и лъэпкъыр, хэкур щигъафIэ зэпытт. Абы и IэдакъэщIэкI «Адыгэ хабзэ» тхылъыр зэрымылъ зы адыгэ унагъуи щыIэу къыщIэкIынкъым.
Нобэ мы унэм кIэралъхьа пхъэбгъур иджыри зэ щыхьэт тохъуэ лъэпкъым хуэпсэуахэм я цIэхэр зэрымыкIуэдыжыр, - жиIащ Къумахуэм.
КъБКъУ-м и президент, профессор Къарэмырзэ Барэсбий и къэпсэлъэныгъэм МафIэдзым курыт еджапIэм зэрыщригъэджам и мызакъуэу, и класс унафэщIу зэрыщытари къыхигъэщащ. Уеблэмэ Къарэмырзэм и япэ статьяр «Университетская жизнь» газетым къытрезыгъэдзауэ щытар Сэрэбийт.
- А лIы щэджащэр КъБР-м и Къэрал саугъэтым и лауреат тIэунейрэ зэрыхъуар и лэжьыгъэ къызэрымыкIуэхэм я фIыгъэщ. Абы и закъуэщ ди республикэм апхуэдэу исар. «Адыгэ хабзэ» тхылъыр Iэужь мыкIуэдыжщ, абыкIэ дэ хабзэр дджыжым и мызакъуэу, ар мыкIуэдыжын лъэужь дахэщ. Адыгэ щыпсэу дэнэ къэралми щыIэщ а тхылъыр.
«Адыгэ псалъэ» газетым и редактор нэхъыщхьэ, Къэбэрдей Адыгэ Хасэм и тхьэмадэ ХьэфIыцIэ Мухьэмэди къызэхуэсахэм захуигъэзащ.
- МафIэдз Сэрэбийрэ сэрэ зэныбжьэгъуфIу дызэрыщытам и мызакъуэу, дызэрызэгъунэгъум и фIыгъэкIэ махуэ къэс дызэрылъагъурт. ИкъукIэ цIыху гъэщIэгъуэнт. Абы адыгэбзэкIэ къытхуигъэна лэжьыгъэхэр фIыгъуэ мылъытэщ. «Адыгэ хабзэ» тхылъыр япэу къыщыдэкIам къызэрымыкIуэу сыщыгуфIыкIат, абы пэхъун тхылъ Кавказ Ищхъэрэм илътэкъым. Гъэ кIуам а тхылъыр Емуз Баязит зэридзэкIри, Тыркум къыщыдэкIауэ щытащ. Абы и лъэтеувэм дэри дыхэтати, а тхылъым, езы Сэрэбий абы къыщыхуащIа пщIэм ди щхьэр лъагэу дигъэлъагъужауэ дыкъэкIуэжат. Абы хуэдэлIкъым ящыгъупщэр. Мы Iуэхур жэрдэм зыщIа псоми фIыщIэ яхузощI. Абы лъэпкъым хуищIар тщымыгъупщэу, дыхуэфащэу Тхьэм дигъэпсэу.
КъыкIэлъыкIуэу псалъэ иратащ КъБР-м и Парламентым и УнафэщI Егоровэ Татьянэ.
- Сэ нобэ Парламентым и закъуэкъым сызилIыкIуэр, атIэ благъэ тхуэхъуа МафIэдз лъэпкъми къабгъэдэкIыу сыпсэлъэну сыхуейт. Си жагъуэ зэрыхъунщи, сэ Сэрэбий щыпсэум сцIыхуакъым, иужькIэ и IэдакъэщIэкIхэмкIэ, къыщIэна унагъуэмкIэ нэIуасэ зыхуэсщIауэ аращ. Ар хабзэм тетхыхь къудейтэкъым, атIэ ткIийуэ абы тет цIыхут. Лъэпкъ хабзэхэм теухуа сыт хуэдэ упщIэми и жэуап нэс щыбогъуэт абы и тхылъым. Мы дауэдапщэм хэтыну къеблэгъа псоми фIыщIэ ин яхуэсщIыну сыхуейщ, - захуигъэзащ абы къызэхуэсахэм.
Сэрэбий и къуэш МафIэдз Борис къызэхуэсахэм зэIущIэм и кIэухыу фIыщIэ псалъэкIэ захуигъэзащ, абы жиIащ и къуэшыр лъэпкъым папщIэ зэрыпсэуар, ауэ щыхъукIи и гугъуехьыр псыхэкIуадэ мыхъуауэ къызэрилъытэр. Абы пщIэ хуэзыщI, зылъытэ цIыхухэр зэрыщыIэм гушхуэныгъэ къызэрыхилъхьэри дыщIигъужащ. Борис щхьэхуэу фIыщIэ хуищIащ Сэрэбий и щIэгъэкъуэну сыт щыгъуи щыта, нобэми лъэпкъым хуэлэжьэн IэнатIэ мытыншыр езыхьэкI ХьэфIыцIэ Мухьэмэд.
МафIэдзым теухуауэ зэIущIэм къыщыпсэлъащ профессор, КъБР-м Гуманитар къэхутэныгъэхэмкIэ и институтым и лэжьакIуэ, IуэрыIуатэдж Гъут Iэдэм, КъБР-м и ТхакIуэхэм я зэгухьэныгъэм и тхьэмадэ Беппаев МутIэлип сымэ, нэгъуэщIхэри.
ЗэIущIэм и кIэухым фэеплъ пхъэбгъум удз гъэгъахэр тралъхьащ.
