КъМР-ни Башчысы Казбек Коков кесини инстаграм-аккаунтунда  «Тюзюнлей линиясыны» болжалы 29 июльдан 3 августха кёчюрюлгенини юсюнден билдиргенди.
«Багъалы шуёхла! «Тюзюнлей линиягъа» жиберилген тилеклени бла тарыгъыуланы саны ёсюп барады. Алагъа мен кюн сайын да къарайма, кёплери тинтиле турадыла. Ала асламысында саулукъ сакълау, социал болушлукъ, суу эм газ бла жалчытыу, транспортну иши эмда башха жумушла бла байламлыдыла. Къыйын соруула, тюз критика да бардыла, алай ыразылыкъларын билдиргенле, жылы сёзле айтханла да кёпдюле. Республикада бола тургъан ишлеге сансыз къарамагъанланы барысына да ыспас этеме..
Аны бла бирге 29 июльда бизни республикагъа уллу магъананы тутхан федерал жыйылыугъа къатышыргъа тюшгенини юсюнден да билдирирге сюеме. Ол себепден «Тюзюнлей линияны» жууукъ замандагъы геуюрге кюннге – 3 августха – кёчюрюуню дурус кёреме. Бу оноуну иги жаны да барды – билдириулени саны ёсюп баргъанын эсге алсакъ, не къадар кёп адамгъа тилеклерин бла дауларын туура этерге, бизге уа бютюн кёп соруулагъа къараргъа онг чыгъады», - деп жазгъанды Къабарты-Малкъарны Башчысы республиканы жамауатына чакъырыу сёзюнде.
«Билдириулени неда сорууланы кёп каналлы телефон номерге сёлешип берирге боллукъду: 8 (8662) 40-90-07. Текстлени бла видеоланы уа  kokov-online@mail.ru электрон почтагъа неда «ВКонтактда» мени энчи бёлюмюме жиберигиз», - деп эсгертгенди Казбек Коков.