Бу кюнледе Зольск районда «Сабанны кюню - 2021» деген семинар-кенгешни чеклеринде картоф урлукъчулукъгъа жораланнган жыйылыу болгъанды. Аны КъМР-ни Эл мюлк министерствосу къурагъанды. Бу ишге районланы эмда илму учрежденияланы келечилери, картоф ёсдюрюу бла кюрешген предпринимательле эм башхала къатышхандыла, деп билдиргендиле ведомствону пресс-службасындан.
Жыйылыуну ача, министр Хасан Сижажев былай айтханды: «Бизни къыралда ётмек бла бирге эм магъаналы ашладан бирине картоф саналады. Не заманда да анга «экинчи ётмек» деп айтып болгъандыла. Аны себепли картофну ёсдюрюуге энчи эс бурулады. Къабарты-Малкъарда бу иш бла кюреширге сегиз минг гектар бёлюнеди. Былтыр мюлклени бары да андан 180,7 минг тонна жыйгъандыла».
Картофну тирликлилигини юсюнден министр энчи сагъыннганды. Ол айтханыча, жылдан-жылгъа ол кёбейе барады: «Былтыр бир гектардан 236 центнер жыяргъа къолубуздан келгенди. Эсге сала айтсам, 2015 жылда ол жаланда 173 центнер эди. Кесигиз кёресиз, тирликлилик нечик кёбейгенин. Ол а асламысында иги урлукъ себилгени себеплиди».
Аны урлугъун ёсдюрюу жаны бла эм уллу мюлкге бизде «Зольский картофель» саналады. Ол «Россей Федерацияда картофну селекциясын эмда урлукъчулугъун айнытыу» илму-техника программагъа тири къатышады.
Жыйылыугъа келгенле мюлкде картофну къаллай тюрлюлерин ёсдюргенлери бла шагъырейленнгендиле. Анда 170 гектарда он сорт эмда онеки гибрид болгъанын кёргендиле. Асламысы (80 проценти) бизни къыралда жарашдырылгъан тюрлюлеридиле.
Хар не да тап болса, келир жылдан башлап предприятие жыл сайын беш мингден артыкъ тонна урлукъ чыгъарып турлукъду. Аны жаланда производстволу мюлклеге угъай, адамлагъа да сатарыкъдыла, деп ышандыргъандыла Эл мюлк министерствода.