КъБР-м и Iэтащхьэ КIуэкIуэ Казбек иригъэкIуэкIащ хабзэр хъумэныр къызэгъэпэщынымкIэ зэпымыууэ лажьэ зэзыгъэуIу зэхуэсым, Къэбэрдей-Балъкъэр Республикэм Экономикэ, жылагъуэ шынагъуэншагъэмкIэ и советым я зэIущIэ.
ЗэIущIэм хэтащ КъБР-м и Правительствэм и УнафэщI Мусуков Алий, КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, УФ-м и Президентым и полномочнэ лIыкIуэу Кавказ Ищхъэрэ федеральнэ округым щыIэм и аппаратым и федеральнэ инспектор нэхъыщхьэ Мэкъуауэ Тимур, хабзэхъумэ, кIэлъыплъакIуэ органхэм, министерствэхэм я унафэщIхэр, республикэм и муниципальнэ щIыналъэхэм я Iэтащхьэхэр.
Псалъэмакъыр нэхъыбэу теухуауэ щытащ «ФIагъ лъагэ зиIэ автомобиль гъуэгу шынагъуэншэхэр», «ПсэупIэмрэ къалэ щIыналъэмрэ», «Экологие» лъэпкъ, федеральнэ проектхэр гъэзэщIэным пыщIа Iуэхухэм. Докладхэр ящIащ КъБР-м транспортымрэ гъуэгу хозяйствэмкIэ и министр ДыщэкI Аслъэн, КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим, КъБР-м щIыуэпсым и хъугъуэфIыгъуэхэмрэ экологиемкIэ и министр Шаваев Ильяс сымэ.
ДыщэкI Аслъэн къызэригъэлъэгъуамкIэ, гъуэгум къыщыхъу щIэщхъухэр ягъэмэщIэн мурадкIэ нэхъыбэрэ фэбжьхэр къыщыхъуу къалъыта щIыпIэхэм хиубыдэу метр 300 ирагъэбыдэкIащ, гъуэгу напщIэу метр 400-м кIапсэхэр щаукъуэдиящ, светофор зэмылIэужьыгъуэхэр, уэздыгъэхэр щыфIадзащ. Зэгъэпэщыжын яухащ «Кавказ» автомобиль гъуэгум хиубыдэу Шэджэм ЕтIуанэ къуажэм щегъэжьауэ Налшык и дыхьэпIэм нэс, Бахъсэн къалэм кIуэцIрыкI гъуэгур, Аруан къуажэм щегъэжьауэ Аушыджэр къуажэм и дэкIыпIэм нэс, Аушыджэр къуажэм щегъэжьауэ Къэщкъэтау посёлкэм нэс. Апхуэдэу «Кавказ» автомобиль гъуэгум щыщу километр 37-м зрагъэубгъу автомашинэхэр сатыриплIу щызекIуэфын хуэдэу. Шэджэм къалэм иджыпсту щолэжь парк комплексыр зыхуей хуэгъэзэным. Урысейпсо IэIэтым ипкъ иткIэ яубзыхуахэм хиубыдэу 2022 гъэм зэIузэпэщ ящIынущ муниципальнэ жылагъуэу 7.
Республикэм и Iэтащхьэм мы IэнатIэм и унафэщIхэм яхуигъэуващ ирагъэкIуэкI лэжьыгъэхэм я фIагъымрэ ахэр щызэфIагъэкIын хуей пIалъэхэм къыкIэрымыхуу зэрылажьэмрэ ткIийуэ кIэлъыплъыну. КIуэкIуэ Казбек Iуэхур зэгъэщIылIа министрхэмрэ администрацэхэм я Iэтащхьэхэмрэ гу лъаригъэтащ жылагъуэхэм я зэIузэпэщыныгъэм иджыпсту мыхьэнэ хэха зэриIэм. «Подрядчикхэм ягурыгъэIуэн хуейщ, - къыхигъэщхьэхукIащ абы, - мы Iуэхур социальнэ политикэм къыгуэхыпIэ имыIэу зэрыпыщIар. ЗэIузэпэщ псэукIэ зиIэ сабийхэр къэзыухъуреихь дунейм нэгъуэщI нэкIэ йоплъ. Сабий джэгупIэхэр, паркхэр, лъэс зекIуапIэхэр зэщIэкъуауэ, дахэу къабзэлъабзэу щытыпхъэщ. Подрядчикхэр я къалэнхэм бгъэдэтын хуейщ, езыхэм я унагъуэ лэжьыгъэ ирагъэкIуэкIым хуэдэу».
КъБР-м и Iэтащхьэм къыхилъхьащ хьэзыр ящI ухуэныгъэхэр лажьэу зэраутIыпщ щIыкIэр зэрахъуэкIыну, апхуэдэ къэпщытэныгъэхэр зыхуэфащэ IэщIагъэлIхэр зыхиубыдэ комиссэхэм ирагъэкIуэкIыну.
Коронавирус уз зэрыцIалэр къызэщIэрыуэжу зэрыхуежьам къыхэкIыу УФ-м и лъэпкъ шынагъуэншагъэр гъэбыдэным икIи а узыфэм земыгъэубгъуным хуэунэтIа зи чэзу Iуэхухэр дэгъэкIыным зэIущIэм гулъытэ хэха щыхуащIащ.
«Роспотребнадзор»-м и Управленэу КъБР-м щыIэм и унафэщI Пагуэ Жыраслъэн нэхъ тригъэчыныхьащ республикэм къакIуэ цIыхухэр къэрал гъунапкъэм къыщызэпрыкIкIэ санитар-карантин къэпщытэныгъэ къызэрагъэпэщын папщIэ абы-хэм анкетэ щхьэхуэ ятхын зэрыхуейм. Апхуэдэу нэгъуэщI къэралхэм къикIа цIыху-хэм я къалэнщ коронавирус узыфэм теухуауэ лабораторэ къэпщытэныгъэхэр махуищым къриубыдэу зэфIагъэкIыну. Апхуэдэу абы жиIащ мы уз шынагъуэр къызэрежьэрэ административнэ къуаншагъэхэм ятеухуауэ протоколу 196-рэ «Роспотребнадзор»-м и Управленэу КъБР-м щыIэм и лэжьакIуэхэм зэратхар. Абыхэм япкъ иткIэ судхэм къащтащ административнэ къуаншагъэхэр зэралэжьам теухуа унафэу 106-рэ икIи ягъэкъуаншэхэм псори зэхэту сом мелуан 1,2-кIэ етхьэкъуащ.
Апхуэдэу зэIущIэм щыхэплъащ ягъэтIысауэ щытахэм ящыщу ди щIыналъэм зэпымыууэ щыпсэуну къэзыгъэзэжахэр гъащIэм хэгъэзэгъэжыным хуэунэтIауэ зэфIагъэкIхэм. Абы теухуауэ къэпсэлъащ КъБР-м лэжьыгъэмрэ социальнэ зыужьыныгъэмкIэ и министр Асанов Алим, Налшык къалэ округым и щIыналъэ администрацэм и Iэтащхьэ Ахъуэхъу Таймураз сымэ.
Къэрал кIуэцI IуэхухэмкIэ министру КъБР-м щыIэ Павлов Василий, Урысейм и Банкым и Ипщэ управленэ нэхъыщхьэм и унафэщIым и къуэдзэ Храпуновэ Аллэ сымэ тепсэлъыхьащ финанс хьэгъэщагъэхэм ятеухуа интернет джэгухэр кIуэтэху нэхъыбэ зэрыхъум. ЩIэпхъаджащIэхэм къызэрагъэпэщ интернет проектхэм цIэрэ щхьэрэ зиIэ цIыхухэр гъэпцIагъэкIэ щыхашэ икIи ахэр къагъэсэбэпурэ цIыхухэм ахъшэшхуэ щыфIашх къохъу. Абы хиубыдэу къызэхуэсахэм къагъэлъэгъуащ хабзэншагъэхэр къэмыгъэхъунымкIэ банк IэнатIэмрэ хабзэхъумэ органхэмрэ нэхъ быдэу зэпыщIауэ зэдэлэжьэн икIи профилактикэ Iуэхухэр щIагъэхуэбжьэн зэрыхуейр.
Зыхэплъа Iуэхухэм япкъ иткIэ зэIущIэм унафэ пыухыкIахэр къыщащтащ.