Къэбэрдей-Балъкъэрым и Муслъымэнхэм я дин IуэхущIапIэм щекIуэкIа зэхуэсым
Къэбэрдей-Балъкъэр Республикэм и Муслъымэнхэм я дин IуэхущIапIэр къызэрызэрагъэпэщрэ илъэс 30 зэрырикъур Налшык къалэ щагъэлъэпIащ.
МахуэщIым ирихьэлIэу къызэрагъэпэща «Кавказ Ищхъэрэм щыIэ дин IуэхущIапIэхэр зэрыт щытыкIэмрэ къапэщылъхэмрэ» фIэщыгъэр зиIэ зэхуэсым кърихьэлIащ Дагъыстэным, Шэшэным, Ингушым, Къэрэшей-Шэрджэсым, Адыгейм, Къалмыкъым, Краснодар щIыналъэм щыщ муф- тийхэр, Iимамхэр, дин лэжьакIуэхэр.
КъБР-м и Муслъымэнхэм я дин IуэхущIапIэм и муфтий Дзасэжь Хьэзрэталий къызэхуэсахэм фIыщIэ яхуищIа нэужь, къакIуа гъуэгуанэм кIэщIу ириплъэжащ, тхыдэ пщалъэм тету убгъэдыхьэмэ, илъэс 30-р мыпIалъэ кIыхьми, куэд зэрахузэфIэкIар, узэрыгушхуэ хъун лэжьыгъэшхуэ зэрызэфIахар къыхигъэщащ.
«КъБР-м и Муслъымэнхэм я дин IуэхущIапIэм и лэжьыгъэр, - жиIащ Дза- сэжьым, - къыщыунэхуа махуэм щегъэжьауэ нобэм къэсыху зыхуэунэтIари зыхуэгъэпсари зы Iуэхущ - муслъымэныгъэм и лъабжьэмрэ фIэщхъуныгъэм и пкъохэмрэ а ди- ныр зезыхьэхэм я деж захуагъэмрэ пэжыгъэмрэ тету нэхьэсынырщ, зэныкъуэкъурэ зэпэщIэувэрэ къыхэмыкIыу лъэпкъыбэр щыпсэу ди щIыналъэм илъ мамырыгъэр хъумэнырщ. Дауи, къэткIуа гъуэгуанэм ущыхуеплъэкIыжкIэ, дызыгъэнэщхъеини дызыгъэгуфIэни куэду тлъэгъуащ - диIащ жагъуэу дигу къэдгъэкIыж хэщIыныгъэхэри, ди нэгу щIэкIащ укъызэщIэзыIэтэ Iуэхугъуэхэри, гупсысапIэ дыхэзыдза щытыкIэ гугъухэ-ри мызэ-мытIэу къытлъыкъуэкIащ. Апхуэдэу щыт пэтми, дыщIэгушхуэнрэ дыщIэпэгэну ди Iуэхум хэлъар нэхъыбэщ, тхужыIэнущ. Дэтхэнэ цIыху-ми хуитыныгъэ иIэщ и фIэщ хъу диным тетыну, абы тещIыхьа хабзэхэр зэрихьэну. А щытыкIэр ди щIыналъэм диныр къыщыгъэщIэрэщIэжыным, Тхьэм и псалъэ пэжыр Бегъымбар лъапIэм цIыхухэм къазэрыхуихьам хуэдэу нэхьэсыным толажьэ, абы хуэунэтIауэ щыIэ Iэмалхэр нэхъыэ ещI».
Дзасэжьым КъБР-м и Муслъымэнхэм я дин IуэхущIапIэм и зэпыщIэныгъэхэми я гугъу ищIащ: «Гуапэу къыхэзгъэщыну сыхуейт Кавказ Ищхъэрэм щыIэ муслъымэн IуэхущIапIэхэр дызэрызэдэлажьэр, щIэх-щIэхыурэ дызэрызэлъэIэсыр. Дэ къыт-лъысу къатщтэ унафэхэр дин щIэныгъэм теухуауэ щытын хуейщ. ЩIэныгъэм гъунэ иIэкъым, узыщымыгъуазэхэр мымащIэу къыхэкIынущ. Абы щыгъуэм акъыл зэхэдзэ тщIыуэ дызэрызэбгъэдэтыр зимыуасэ щыIэкъым. Уеблэмэ, ар ди лъэпкъхэм я зэхущытыкIэхэр езыгъэфIакIуэ, зэпэблагъэ зыщI Iуэхугъуэхэм ящыщу жы-пIэ хъунущ».
Апхуэдэу къыхэгъэщын хуейщ зэхуэсыр муслъымэн диным и тхыдэм-рэ щэнхабзэмрэ фIыуэ щыгъуазэ, щIэныгъэ куу зиIэ IэщIагъэлIхэр гъэхьэзырыным хуэунэтIауэ УФ-м къищта къэрал программэм ипкъ иткIэ зэрекIуэкIар.