«Единая Россия» партия регионлада инфраструктура объектлени айнытыугъа себеплик этерикди: кёп къатлы юйлени арбазларын тапландырыудан башлап, артыкъда магъаналы уллу проектлени къурулушларына дери. Аны юсюнден партияны официальный сайтында белгили этиледи (https://kabardin-balkar.er.ru).
Санкт-Петербургда экономика форумда «Инфраструктура проектле – регионну айнытыуну мадарлары» деген жыйылыуунда партияны Генсоветини секретары Андрей Турчак субъектледе болгъан кезиуде планла бла шагъырейленнгенин айтханды. Ол себепден партия президентден алагъа къырал даражада болушлукъну юсюнден тилегенди. «Къыралны оноучусу аны тюзге санагъанды эмда Посланияда жер-жерледе инфраструктура проектлеге себепликни юсюнден билдиргенди»,-дегенди Турчак.
Инфраструктура проектлеге уа бюджет кредит 15 жылгъа берилликди, аны онеки айгъа ставкасы 3 процентге жетеди. 2023 жылны ахырына дери бу жумушлагъа 500 миллиард сом кредит берирге белгиленеди. РФ-ни Правительствосуну башчысыны орунбасары Марат Хуснуллин бу ахчаны къоратхандан сора энтта жангы заявкала жазаргъа кереклисине эс бургъанды. «Проектле регионланы айнытыу жаны бла комиссияны жыйылыуунда сюзюллюкдюле»,-деп къошханды ол.
Ахчаны инженер, коммунал, социал, турист инфраструктураны айнытыугъа, пассажир транспортну ишин игилендириуге къоратыргъа боллукъду. Вице-премьер-министр ахча регионну экономика болумуна къарамай, барысына да жетерге кереклисин чертгенди. Сёзге, КъМР-де туризм инфраструктураны айнытыуну юсюнден республиканы башчысы Казбек Коков Парламентни депутатларына Посланиясында да айтхан эди. «Ич туризмни ёсдюрюу жаны бла жангы программаны чеклеринде уа къонакъ юйлени ишлетиуге льгота кредитле берилликдиле.
Аны бла 15 жылгъа хайырланыргъа боллукъду, ставкасы уа 5 процентге жетеди. Бу амалны хайырланыргъа керекбиз. Ол санда бальнеология курортланы жангыртыуда. Санаторийледе жерлени 10 мингнге кёбейтирге тийишлиди. Алай бла уа Нальчикни курортларында 150 минг адам солуяллыкъды. Алай болса, бек аздан 50 минг ишчи жер къураллыкъды»,-деген эди республиканы таматасы.
Уллу проектле бла бирге уа социал сферагъа да энчи эс бурулургъа кереклиси белгиленнгенди жыйылыуда. Ол санда спортха. 2021-2023 жылгъа къыралны бюджетини проектин хазырлагъан кезиуде «Единая Россияны» депутатлары регионлада физкультура-саулукъ сакълау комплекслени къурулушларына бёлюннген ахча эки кереге кёбейтилирин жалчытхандыла.
Аны бла бирге спорт объектлени жангыртыугъа да эс бурулады. Жер-жерледе инсанланы оюлургъа къоркъуулу юйледен кёчюрюу программа да магъаналылай къалады. Сёзге, «Жашау журт эм шахар болум» миллет проектни чеклеринде 2020 жылда 1 январьгъа Нальчикде 227 жашау журтдан 647 инсан жангы мекямлагъа кёчюрюлгендиле.
КъМР-ни Парламентини депутатларында Посланияда республиканы оноучусу Казбек Коков быйыл оюлургъа къоркъуулу юйледен 750 адамны кёчюрюрге кереклисин айтханды. Бу жумушлагъа 480 миллион сом бёлюннгенди. «Аны бла бирге общежитиялада тургъанланы жашау болумларын игилендирирге, ёксюз сабийлен юйле бла жалчытыргъа тийишлиди. Бу проблемала уа республикада кёп жылланы ичинде тамамланмайдыла. Быйыл а ёксюз сабийлеге 107 фатар берирге план барды»,-дегенэдиол.
Субъектледе жамауат жашагъан жерлерин айбатландырыу жумушлагъа къатышыргъа сюйгенлерини юсюнден да баргъанды сёз. Апрель-май кезиуде партия шахарланы айбатландырыу жаны бла къол кётюрюу бардыргъанды. КъМР-де анга 60 минг адам къатышханын белгилерчады. Аланы асламы Нальчикде Къабарты-Малкъар къырал университетни тийресинде паркны бла «Курортный» скверни жангыртыуну сайлагъандыла.
Тырныауузда уа ара майдан тапландырыллыкъды. Алай бла «Жашау журт эм шахар болум» миллет проектни чеклеринде 2022 жылда республикада жамауат жыйылгъан 7 жер айбатландырыллыкъды.
