КIуэкIуэ Валерэ и цIэр зезыхьэ Къэбэрдей-Балъкъэр къэрал мэкъумэш университетым иджыблагъэ щекIуэкIащ урысейпсо щIэныгъэ-практикэ конференц. «Мэкъумэш IэнатIэм и унэтIыныгъэхэм къыхыхьэ Iуэху зехьэкIэщIэхэр (ухуэныгъэмрэ щIыуэпсым епхахэр, мэкъумэш IуэхущIапIэхэм я механизацэр)» фIэщыгъэр зиIа а зэхыхьэ иным щIэныгъэлIхэр щызэчэнджэщащ, утыку кърахьа IуэхугъуэхэмкIэ я еплъыкIэхэр къыщаIуатэу.
КъБКъМУ-м и пресс-IэнатIэм хъыбар къызэрыдигъэщIамкIэ, щIэныгъэ зэхуэсыр университетым ухуэныгъэмрэ щIым елэжьынымкIэ и факультетым къыщызэрагъэпэщащ. Абы кърихьэлIащ а унэтIыныгъэхэмкIэ къэхутэныгъэщIэ купщIафIэхэр иджыблагъэ зэфIэзыха щIэныгъэлIхэр, Урысей Федерацэм щылажьэ мэкъумэш еджапIэ нэхъыщхьэхэм я лIыкIуэхэри онлайн щытыкIэм иту хэтащ. Зэхуэсым хэтахэм я пащхьэ доклад зыбжанэ щащIащ щIэныгъэлIхэм. Ахэр ятеухуат уэлбанэшхуэхэм е уэсыр щыткIужкIэ бгыхэм къех хабзэ ятIэпсыр мэкъумэш губгъуэхэм, гъавэ щIапIэхэм зэран зэрыхуамыгъэхъун Iэмалхэм, щIым пкърылъ гуащIэр къэхутэнымкIэ хьэршым щащI сурэтхэр нэхъ шэщIауэ къэгъэсэбэпыным, апхуэдэуи псыр зыщIэуэ хабзэ щIыналъэхэм инженер-гидрологие къэхутэныгъэхэр зи лъабжьэ Iэмэпсымэхэр щыгъэувыным. Апхуэдэу конференцым къыщаIэтащ кадастрым зегъэужьыным, щIыуэпсым и Iэмалхэр къэгъэсэбэпыным епха Iуэхугъуэхэр.
Куэдым яфIэхьэлэмэтащ ди мэкъумэш университетымрэ Красноярск къэрал мэкъумэш еджапIэ нэхъыщхьэмрэ я щIэныгъэлIхэм я Iуэху еплъыкIэхэр. Ахэр зи лъабжьэ дэфтэрхэр къыщащтащ конференцым.
Пленарнэ Iыхьэр зэфIэкIа нэужь, конференцым хэтхэр гуп-гупу зэдэлэжьащ. Секцэхэм къыщаIэта Iуэхугъуэ нэхъ хьэлэмэтхэм ящыщщ мэкъумэш IуэхущIапIэхэм екIуалIэ гъуэгухэм адэкIи зегъэужьыныр, нэгъуэщIхэри.
ЩIэныгъэ конференцым щащIа докладхэмрэ абы хэтахэм я къэпсэлъэныгъэхэмрэ КъБКъМУ-м къыщыдэкI щIэныгъэ журналым тетынущ.