КъБР-м и Парламентым и УнафэщI Егоровэ Татьянэ иригъэкIуэкIа зи чэзу зэIущIэм депутатхэм къыщащтащ КъБР-м и Iэтащхьэ КIуэкIуэ Казбек 2021 гъэм накъыгъэм и 17-м республикэм и хабзэгъэув IуэхущIапIэ нэхъыщхьэм Зэрызы­хуигъэзам къыщыгъэлъэгъуахэр зэрагъэзэщIэну Iуэхугъуэхэр.
КъБР-м и Парламентым Къэпщытэныгъэмрэ регламентымкIэ и комитетым и унафэщI Кансаевэ Еленэ зэрыжиIамкIэ, а дэфтэрым лэжьыгъэ 30-м щIигъу къы­зэ­щIеубыдэ. Псом япэу законопроект зыбжанэ зэхагъэувэну я мурадщ, къэпщытэ­ныгъэ лэжьыгъэхэри ирагъэкIуэкIынущ. ­Иужь­рейхэр теухуауэ щытынущ лъэпкъ проектхэр зэрагъэзащIэм, Iулъхьэм зэры­пэ­щIэтым, къэрал, муниципальнэ Iуэхутхьэбзэхэр къызэрызэрагъэпэщым, Къэ­бэрдей-Балъкъэрым инвестицэ Iуэхухэр ­зэ­рыщрагъэфIакIуэм, промышленность псын­щIэм, егъэджэныгъэм, спортым, узын­шагъэр хъумэным зэрызрагъэужьым, цIыху щхьэхуэхэр псэупIэкIэ къызэрызэрагъэпэщым, нэгъуэщIхэми.
- Къэдгъэлъэгъуа лэжьыгъэхэр купщIа­фIэу зэпкърыхын, тэмэму и чэзум гъэзэщIа хъун хуейщ. Нэхъыбэр зытеухуар КъБР-м и Iэтащхьэм гулъытэ хэха зыхуищIа социальнэ Iуэхухэращ, - жиIащ Егоровэ Татьянэ.
КъБР-м и Парламентым и комитетхэм пщэрылъ щащIащ гъатхэ, бжьыхьэ лэжьэгъуэхэр къыщапщытэжкIэ, КъБР-м и Iэтащ­хьэм и Зэрызыхуигъазэм щыщу ягъэ­зэщIа Iуэхухэм кърикIуар республикэм и хабзэгъэув IуэхущIапIэ нэхъыщхьэм и Уна­фэщIым хуаIуэтэныр.
ЗэIущIэм щыхэплъащ «КъБР-м ФIэкIыпIэ зимыIэ медицинэ страхованэмкIэ и щIы­налъэ фондым и бюджетыр 2021, 2022 - 2023 гъэхэм теухуауэ» КъБР-м и Законым зэхъуэкIыныгъэхэр хэлъхьэным и IуэхукIэ КъБР-м и законым и проектым.
КъищынэмыщIауэ, депутатхэр тепсэлъы­хьащ федеральнэ законрэ жэрдэму 20-м щIигъум я проектхэм.
КъБР-м и Парламентым Мэкъумэш IуэхухэмкIэ, щIыуэпсыр къэгъэсэбэ­пы­нымрэ ар хъумэнымкIэ и комитетым и унафэщI ТекIушэ Артур щхьэхуэу тепсэ­лъы­хьащ «Экология» лъэпкъ проектыр Къэбэрдей-Балъкъэр Республикэм и щIыналъэм зэрыщагъэзащIэм. КъБР-м и Парламентым ПромышленностымкIэ, транспортымкIэ, связымрэ гъуэгу IэнатIэмкIэ и комитетым и унафэщI Байдаев Сэлихь къызэщIикъуэжащ «Къэбэрдей-Балъкъэр Рес­публикэм и автомобиль гъуэгу шына­гъуэншэхэр» лъэпкъ проектым хыхьэу зэфIагъэкIар.