ТекIуэныгъэм и махуэшхуэм республикэ МВД-м и унафэщIхэм, къэрал кIуэцI IуэхухэмкIэ министру КъБР-м щыIэ, полицэм и генерал-майор Павлов Василий я пашэу, Налшык дэт милицэ скверым ит Хэку зауэшхуэм зи псэр щызыта, мамыр гъащIэм я къалэн ягъэзащIэу хэкIуэда хабзэхъумэхэм я фэеплъым деж удз гъэгъахэр щагъэтIылъащ.
Я псэ емыблэжу мамырыгъэр къытхуэзыхьа зауэлIхэм я фэеплъым пщIэ хуащIыну къекIуэлIащ Къэбэрдей-Балъкъэр Реcпубликэм щыIэ МВД-м и IэнатIэхэм, къудамэхэм я унафэщIхэмрэ къэрал кIуэцI IуэхухэмкIэ органхэм я ветеранхэмрэ. Апхуэдэуи махуэшхуэ зэхыхьэм хэтащ республикэ МВД-м и Жылагъуэ советым и лIыкIуэ Шыбзыхъуэ Сафудинрэ полицэм и япэ кадет классым щеджэ Гочаев Кязимрэ.
Къызэхуэсахэм я дежкIэ гъэщIэгъуэн икIи гуапэ хъуащ абы къыщыхута ГАЗ -69 автомашинэ, републикэм къэрал кIуэцI IуэхухэмкIэ и органхэм я ветеран, милицэм и полковник Шорэ Алик зауэ илъэсхэм и транспортым и теплъэм иригъэзэгъар.
Фэеплъ Iуэхухэм щыпащащ «ЩIыхьым и мафIэ мыужьых» мемориалым. Къэбэрдей-Балъкъэр Республикэм и Iэтащхьэ КIуэкIуэ Казбекрэ полицэм и генерал-майор Павлов Василийрэ удз гъэгъахэр абдеж щагъэтIылъащ. Апхуэдэуи абы хэтащ КъБР-м и Парламентым и лIыкIуэхэр, республикэм и хабзэхъумэ IэнатIэхэм я унафэщIхэмрэ ветеранхэмрэ.
А махуэм Павлов Василий щыIащ КъБР-м щыIэ МВД-м и ветеран, Хэку зауэшхуэм хэта, къэрал кIуэцI къулыкъум и полковник Марченкэ Сергей Фёдор и къуэм и деж. Абы иджыпсту къыщоIэзэ ведомствэм и медико-санитар частым и госпиталым. Министрыр щIэупщIащ фронтовикым и узыншагъэр зыхуэдэм. Ветераным махуэшхуэмкIэ ехъуэхъури, и узыншагъэр щIэх зэфIэувэжмэ зэригуапэр жиIащ. НэхъыжьыфIым псалъэ гуапэхэр жриIащ полицэм и кадет классым и гъэсэн Гочаев Кязим.
Махуэшхуэ хъуэхъум къыхыхьащ Къэбэрдей-Балъкъэрым, Адыгейм, Къэрэшей-Шэрджэсым, Осетие Ищхъэрэ - Аланием, Ингуш республикэхэм я цIыхубэ артист Нэхущ Чэрим. Абы Марченко Сергей тыгъэ хуищIащ игъэзащIэ уэрэдхэр зытет диск икIи ветераным папщIэ композицэ зыбжанэ игъэзэщIащ.
- ФыкъызэрысхуэкIуам си гукъыдэжыр къиIэтащ, фIыщIэшхуэ фхузощI,- жиIащ ветераным.