Арт заманда Элбрус районда асламысында энчи иели юйле ишленедиле. Болсада социал объектлени къурулушлары да тохтап къалмагъандыла. Сёз ючюн, былтырны ахырында Терс-Къолда орта школну сабий садыны мекямы хайырланыргъа берилгенди. Быллымда жалгъан кырдыгы бла футбол майдан салыннганды. Тырныауузда «Шахарда тап болум къурау» программаны чеклеринде эки юйню арбазлары тап халгъа келтирилгендиле. Дагъыда эки журтну тийрелерин айбатландырыргъа белгиленеди, ол жаны бла ишле башланнгандыла.
Проектге кёре, ол жумушлагъа 5,5 миллион сомдан артыкъ къоратыргъа белгиленеди. Андан сора да, шахар коммуникацияланы жангыртыугъа да ахча бёлюнюрюкдю. «Таза суу» федерал проектге кёре да суу быргъыланы 7,5 километрин жангыртыуну проект-смета документациясы да жарашдырылгъанды.
Ол ишлеге 83,5 миллион сом керек боллукъду. Тийишли документле КъМР-ни Къурулуш эмда жашау журт-коммунал мюлк министерствосуна жиберилгенди. Энди ол проектни федерал программагъа къошууну оноуун этерикди.
Бара-баргъан заманда социал магъаналы объектлеге элтген эки муниципал жолгъа ремонт этерге белгиленеди. Гирхожан сууда жаяу кёпюр ишлеуню проекти да жарашдырыла турады. «345-чи механика завод» акционер общество Тырныауузда тазалаучу комплексни къурулушуну техника-экономика кёрюмдюлерин хазырлагъанды. Ол да Къурулуш министерствогъа жиберилгенди.
Быйыл февральда республиканы Табийгъат байлыкъла эмда экология министерствосу Гирхожан сууну ызын ырхы келтирген ташдан-топуракъдан тазаларыкъ подрядчикни сайлар ючюн конкурс бардыргъаныны юсюнден билдиргенди. Битеу да 80 минг кубометрни тазаларгъа тюшерикди. Ол ишге 21 миллион 300 минг сом бёлюнюрге керекди. Аны республикалы бюджет берликди.
Тырныауузда «Бахсан» спорт-саулукъ комплексде бассейнни къурулушуну проект-смета документациясы 2016 жылда окъуна жарашдырылгъан эди. Анга 454,8 миллион сом керек болгъаны да тергелгенди. Документле Спорт министерствогъа жиберилгендиле, проектни «Россей Федерацияны физкультурасын бла спортун айнытыу» федерал программагъа къошар муратда.
