Видео конференц мардэм тету КъБР-м и Правительствэм и зи чэзу зэIущIэр иригъэкIуэкIащ абы и УнафэщI Мусуков Алий. Абы щытепсэлъыхьащ бюджетым, псэупIэм, медицинэм теухуа Iуэхугъуэхэм.
КъБР-м финансхэмкIэ и министр Лисун Еленэ утыку кърихьащ «2021 гъэм Къэбэрдей-Балъкъэр Республикэм и бюджетымрэ 2022 - 2023 гъэхэм ятещIыхьамрэ ятеухуауэ» КъБР-м и Законым ипкъ иткIэ, КъБР-м и законодательнэ актхэм языныкъуэ Iыхьэхэм къару ямыIэжу къэлъытэным и IуэхукIэ» законхэм я проектхэр, «Къэбэрдей-Балъкъэр Республикэм и бюджетыр 2020 гъэм и мази 9-м зэрагъэзэщIам и IуэхукIэ» проектыр, нэгъуэщIхэри.
Республикэ бюджетым и хэхъуэр тещIыхьащ налог законодательствэм халъхьэ зэхъуэкIыныгъэхэм, налог зытралъхьэхэм къагъэхъу щытыкIэм, коронавирус уз зэрыцIалэм и зэранкIэ ягъэува къыпэубыдыныгъэхэм дызрагъэува экономикэ мардэм тещIыхьауэ налог зэрызэхуахьэс щIыкIэм, 2021 гъэм - сом мелуан 12 112, 1-м ноблагъэ. Илъэс къакIуэм къагъэсэбэпыну тращIыхьащ сом мелуан 36 422,4-рэ. 2021 - 2023 гъэхэм ахъшэр зытрагъэкIуэдэну яубзыхуар социальнэ Iуэхугъуэхэрщ, мылъкум и нэхъыбэр зыхухахынур цIыхухэм егъэджэныгъэм, узыншагъэр хъумэным, щэнхабзэм, физкультурэм, спортым, мэкъумэш IэнатIэм ехьэлIа къэрал Iуэхутхьэбзэхэр яхуэщIэнырщ. Республикэ бюджетым и проектыр зыхуэгъэпсар псэукIэр егъэфIэкIуэнырщ.
КъБР-м экономикэ зыужьыныгъэмкIэ и министр Рахаев Борис и къэпсэлъэныгъэр теухуауэ щытащ «Сату Iуэху хэмыту бэджэнду щIы Iыхьэ зрат псэупIэ-щэнхабзэ, коммунально-бытовой мыхьэнэ зиIэ объектхэр, инвестицэ проект инхэр зытетын хуей мардэхэр убзыхуным теухуауэ» Къэбэрдей-Балъкъэр Республикэм и Законым и япэ Iыхьэм зэхъуэкIыныгъэ хэлъхьэным и IуэхукIэ» законым и проектым. Ар нэхъыбэу зэхьэлIар мэкъумэш IэнатIэм епха инвестицэ проект инхэр щагъэзащIэ щIыпIэхэр зэрат щIыкIэрщ. ЗэхъуэкIыныгъэхэр халъхьэмэ, экономикэм и IэнатIэ зэмылIэужьыгъуэхэм хухах щIыр фейдэ пылъу гуэшынымкIэ, иджыпсту щIы гуэшыным теухуауэ республикэм щыщыIэ гугъуехьхэр гъэзэкIуэжынымкIэ сэбэп хъунущ.
КъБР-м транспортымрэ гъуэгу хозяйствэмкIэ и министр ДыщэкI Аслъэн тепсэлъыхьащ Щхьэлыкъуэ - Каменкэ гъуэгур «Северный» автовокзалым зэрекIуалIэ лъагъуэр гъуэгущIэхэм я бжыгъэм хэгъэхьэным.
КъБР-м узыншагъэр хъумэнымкIэ и министрым и къалэнхэр пIалъэкIэ зыгъэзащIэ Аникушинэ Татьянэ утыку кърихьащ «ФIэкIыпIэ зимыIэ медицинэ страхованэмкIэ Къэбэрдей-Балъкъэр Республикэм и щIыналъэ фондым 2021 гъэм и бюджетымрэ 2022 - 2023 гъэхэм ятещIыхьамрэ теухуауэ» законым и проектыр. Ахъшэр зытрагъэкIуэдэнухэм ящыщщ КъБР-м и ОМС щIыналъэ программэр гъэзэщIэныр, медицинэм и лэжьакIуэхэм я Iэзагъыр хэгъэхъуэныр къызэгъэпэщыныр, медицинэ IэмэпсымэщIэхэр къэщэхуныр, щыIэхэр зэгъэпэщыжыныр, нэгъуэщIхэри. Законым и проектыр къащтэмэ, ФIэкIыпIэ зимыIэ медицинэ страхованэмкIэ программэм трагъэкIуэдэн хуей мылъкур хухахыфынущ. Ар цIыхухэм пщIэншэу медицинэ Iуэхутхьэбзэхэр яхуэщIэным теухуа программэм и Iыхьэ нэхъыщхьэщ.
КъБР-м лэжьыгъэмрэ социальнэ зыхъумэжыныгъэмкIэ и министрым и къалэнхэр зыгъэзащIэ Ацкъан Ратмир тепсэлъыхьащ КъБР-м и Правительствэмрэ Сабийхэм ядэIэпыкъунымкIэ фондымрэ зэращIылIа зэгурыIуэныгъэм дыщIыгъужыным теухуа проектым. Ар теухуащ гъащIэм щытыкIэ гугъу иригъэува сабийхэм папщIэ урысейпсо зэпыщIэныгъэм ехьэлIауэ КъБР-м щылажьэ «детский телефон доверия» Iуэхум. Ар Къэбэрдей-Балъкъэрым 2010 гъэ лъандэрэ щыIэщ. Иджы мы проектым Iэ щIадзмэ, абы илъэс дызыхуэкIуэми къыпищэнущ.