Къабарты-Малкъарда предпринимательлеге деп интернетде социал сетьледе ишлерин тирилтирге юйретген тренинг ётгенди алгъаракъда. Анга бизнес бла кюрешгенлени чакъыргъан эдиле. Тренингге къатышханлары ючюн аладан хакъ алынмагъанды, деп билдиргендиле республикада «Мени бизнесим» арадан.

«Социал предприниматель 2024 жылда бизнесни сатыу-алыуун къалай кёбейтсин?» деген юйретиу курс «Нальчик» къонакъ юйде бардырылгъанды, бу жол анга битеу да онбеш адам къатышханды. Ол санда гитче эмда орта предпринимательство бла кюрешгенле, кеслери иш къурап къармашханла, бизнесде энди атламла этип тебирегенле да бар эдиле.

Тренингни бардыргъан Аскер Набитов социал сетьледе экспертлени айнытыу жаны бла онлайн-школну таматасыды, билим бериу проектлени тамамлау бла кюрешеди, кеси да digital-маркетологга саналады. Бу специалист башха предпринимательлени сынамларыны юсюнден хапарлагъанды, сагъынылгъан сетьледе ишни жетишимли бардырырча къаллай амалланы хайырланса иги боллугъун, проект да тирирек айнырыгъын билдиргенди.

Юйретиу курсну кезиуюнде быллай соруулагъа жууапла берилгендиле:

- Бюгюнлюкде предпринимательле эмда специалистле социал сетьледе ишлерге керекмидиле?

- Социал сетьлени бардырыу жаны бла къаллай амалла бардыла?

- Бизнесни онлайн халда тамамларча къыйматлы амалла къаллайдыла?

Спикер ючеуленни проектлерин сюзгенди, алада къаллай чурумла болгъанын туура этгенди.

«Мени бизнесим» арада айтханларыча, быллай курсла предпринимательлеге хакъсыздыла. Ала кезиу-кезиу бардырыла туруучудула, алагъа къатышхан хар кимге да хайырлыды. 

Омарланы Мурат.