Ярославль щекIуэкIащ лъэпкъ гъуазджэхэмкIэ «Ритмы Кавказа» IV лъэп­къыбэ фестивалыр. 

Iуэху дахэр къызэригъэпэщащ Ярославль щIыналъэм лъэпкъ зэпыщIэныгъэхэм зегъэужьынымкIэ щыIэ «Со­дру­жество народов Ярославии» жылагъуэ зэгухьэныгъэмрэ Ярославль къалэм и мэриемрэ. 
Зэхыхьэм хэтащ лъэпкъ зэмылIэужьыгъуэхэм ящыщ артисти 150-м щIигъу. Фестивалым къафэм, уэрэд жыIэным, актёр Iэзагъэм щаIэ зэфIэкIхэр, я лъэпкъ фащэхэм я дахагъэр, я хабзэм щыщ щагъэлъэгъуащ адыгэхэм, ермэлыхэм, азербайджанхэм, осетинхэм, шэ­шэнхэм, ингушхэм, нэгъуэщI лъэпкъхэми. 
Ярославль мэрием жылагъуэм ядэлэжьэнымкIэ и къудамэм и унафэщI Коврайский Андрей зэрыжиIамкIэ, хабзэ дахэ хъуауэ, «Ритмы Кавказа» фестивалыр гъэ къэс къызэрагъэпэщ. Ар лъэпкъ зэныбжьэгъугъэм, зэгурыIуэныгъэм я зэхы­хьэ­шхуэщ. Ярославль къалэм лъэпкъ зэмылIэужьыгъуэ куэд щопсэури, ахэр зэры­щIэным, зэрылъытэным мыхьэнэшхуэ иIэщ.
Фестивалым ирагъэблэ­гъащ дунейпсо, урысейпсо зэпеуэхэм я лауреат «Шагъдий» цIыхубэ къэфакIуэ ансамблыр. Илъэ­ситху ныбжьым щыщIэдзауэ гупым и къэфакIуэ ныбжьыщIи 162-рэ хэтащ абы.
- Зэхыхьэм республикэм и лIыкIуэу дыхэтыну дызэрырагъэблэгъар дэркIэ пщIэш­хуэщ икIи гуапэщ, - жиIащ гупым и художественнэ унафэщI Унэжокъуэ Заремэ. - Апхуэдэ зэхыхьэхэм гупыр дыхэтыну тфIэфI дыдэщ. Фестивалыр ди щIалэгъуалэми гукъинэж ящыхъуащ. Зэманыр мытыншми, лъэпкъхэм, цIыхухэм я зэхуаку пщIэ, зэныбжьэгъугъэ зэрыдэлъыр гуапэщ!
Ансамблым Ярославль сы­хьэтитIрэ ныкъуэкIэ концерт щитащ. Абыхэм ягъэ­лъэ­гъуащ куэд щIауэ ягъэзащIэ, фIыуэ ялъэгъуа къафэхэри иджы дыдэ ягъэувахэри.
«Шагъдий» ансамблыр мы махуэхэм Москва щыIэщ, гупыр къызэрызэрагъэпэщрэ илъэсипщI зэрырикъуар зэ­рагъэлъапIэ концертхэм абы щыпащэу. 

ТЕКIУЖЬ Заретэ.