Алайды да, конкурсну «Орус маданиятны ана тилде» деген бёлюмюнде биринчи жерге Черек районну Къашхатау элини мектебинде окъугъан Чатталаны Самира чыкъгъанды, Нальчикде 29-чу номерли гимназиядан Мария Карданова экинчи болгъанды, Прохладныйден 6-чы номерли гимназияны окъуучусу Низана Заптиева уа «Лауреат» деген атха тийишли кёрюлгенди.
Школчуланы араларында бардырылгъан бу конкурс ючюнчю кере къуралгъанды. Аны РФ-ни Жарыкъландырыу министерствосу РФ-ни Халкъларыны ана тиллерини федерал институту бла бирге бардырады. Конкурсну эсеплерине кёре сабийлени чыгъарма жазмаларындан китап жыйышдырылады. Анга Россейни халкъларыны кёп тиллеринде жазылгъан чыгъармала киредиле.
Конкурсну федерал кезиуюне сайланнганла энчи сертификатла аллыкъдыла, хорлагъанла эмда экинчи, ючюнчю жерлеге чыкъгъанла уа багъалы саугъала къоллу боллукъдула.
Быйыл эришиулеге Россей Федерацияны сексен регионундан 835 адам къатышханды. Аллай бир школчуну араларында бизни жерлешлерибизни айырмалы болгъанлары бютюн къууандырады.
Конкурс тёрт къауумгъа юлешинип бардырылгъанды. Алагъа 1-11-чи классланы окъуучулари киргендиле. Ала кеслерини адет-тёрелерини юслеринден орус тилде, орус маданиятны юсюнден а ана тиллеринде чыгъарма ишле жазаргъа керек эдиле. Аланы магъаналары кёп тюрлю эди: Устазны эмда насийхатчыны жылы, Расул Гамзатовну 100-жыллыгъы, орус жазыучу Михаил Пришвин туугъанлы 115 жыл толгъаны, Россейде илмуну эмда технологияны айныулары, Сталинград сермешде совет аскерле немисли фашистлени ууатханлы 80-жыллыгъы эмда башхала.
Люба Адилова.
