Шёндюгю заманда кредит бла хайырланмагъан адамны тапхан къыйын болур, баям. Алай банк да аны хар кимге да берип къоймайды. Ахчасыз къалмаз ючюн бир ненча жорукъну толтурургъа керекди.

Биринчиден, кредит ючюн борчугъуз бар эсе, аны тёлерге керекди эмда андан ары ахчаны заманында берген хайырлыды. Кредит болумугъузну игилендириу да магъаналыды.  Сёзге, артыкъ багъалы болмагъан товарны алып, ахчаны заманында къайтарыргъа. Алай бла банк сизге ышаныргъа жарагъанын кёрлюкдю.

Андан сора да микрофинанс организацияладан ахча алмагъыз. Алай бла сиз банкга финанс къытлыгъыгъызны билдирликсиз. Дагъыда финанс жаны бла ышаннгылы болгъаныгъызны ачыкъларгъа керекди. Бир ненча ёнкючюгюз бар эсе, аланы жабаргъа тийишлиди. Аллай онг жокъ эсе уа, рефинансирование амал бла хайырланыргъа жарайды.

Сиз хайырланмагъан кредит картала бар эселе, аланы жапсагъыз игиди. Аллай карталарыгъыз кёп эселе, банкда ишеклик тууаргъа боллукъду.

Бирле заявканы банк къаллай жууап берлик болур деп сынау халда бериучюдюле. Алай банк кредитни берген кезиуде битеу шартланы тинтеди, ахча кереклисини юсюнден тилекле кёп болсала, банкны келечилерини да сизге соруулары   кёп боллукъду. Сиз ахча излеген сунуп, финанс жаны бла ышаннгылы болмагъаныгъызгъа ишеклилик тууарыкъды. Бирде уа банк сиз хыйлачылыкъ хазырлагъан сунарыкъды.

Алай бла бу женгил жорукъланы толтурсагъыз, кредит болумугъузну игилендирирге, ипотека неда транспорт кредит дегенча уллу жумушха банкдан ахча алыргъа да боллукъсуз.