Кёп болмай Къабарты-Малкъар къырал университет къурап   «Expo 2023» деген  конференция болгъанды.  Анда республиканы сынамлы  бизнесменлери  жаш адамла бла тюбешгендиле.  Ала жетишимлерини, рынокда сурам болгъан бизнес-продуктланы,  предпринимательствону айнтыуну   юсюнден айтхандыла, кеслери бир тюрлю иш бла кюреширге сюйгенлеге эсгертиуле бергендиле эм башха шартланы юсюнден да билдиргендиле.

КъМКъУ-ну карьераны айнытыу управлениясыны таматасы Ратмир Коцев, тюбешиуню ача,  къыралны бирси бийик билим берген учрежденияларыча, вуз «Приоритет 2030» программагъа къатышханын, анга кёре регионну айнытыуда танг кесек  къошумчулукъ этгенин билдиргенди.  Андан сора да,  университетде тюрлю-тюрлю билим бериу прогрммала ишлегенлерин, аны чеклеринде гитче эм орта бизнесге тийишли кадрла хазырлагъанын да къошханды.

- Студентлерибиз диплом къоллу болгъанларындан сора, жетишимли урунургъа онг табарлары баш борчларыбыздан бириди.  Анга кёре университет эки жыл мындан алгъа карьера  этерге болушурча «Факультетус» деген цифралы  платформаны   бардыргъанды.  Анда регистрацияны ётгенле эм  анкетаны толтургъанла кеслери жаратхан ишде урунургъа боллукъдула. Бюгюнлюкде аны тизмесинде  2,5 минг чакълы вакансия киреди.      Ол себепден иш бла жалчытыргъа излеген  партнёрларыбызны да анга къошулургъа чакъырама –дегенди Ратмир Коцев.

 Айтылгъан сёзлеге къошула, «Мени бизнесим» деген араны регионда бёлюмюню таматасы Дудуланы Мадина сёлешгенди.  Ол, КъМКъУ студентлеге ахшы  билим бергенден сора да, урунургъа болушханын  болмагъанча магъаналы шартха санагъанды.  Жаш адамла усталыкъларына кёре, ишлер онглары болмагъаны саулай Къабарты-Малкъардан тышында, саулай къыралда да   уллу проблемаладан бири болгъанын  белгилегенди.    Аны бла бирге  «Мени бизнесим»  ара не заманда да  гитче эм орта  предпринимательлеге болушургъа хазырлыгъын  эсге салгъанды.  

Ала жаш предпринимательлеге, эм биринчиден, таукелликлерин тас этмезге чакъыргъандыла.  Аны бла бирге бизесни айтытырча адамла бла иги  сёлеше юйренирге,  не тюрлю ишден да къачмазгъа, амал болуп билимлерин эм сынамларын  байыкъландырыргъа чакъыргъандыла.

Предпринимательле  бизнес ачханда,  биринчиден, бир тюрлю сылтау бла арада даулаш чыкъмазча келишим къураргъа кереклисин айтхандыла. Бир тюрлю иш башларгъа онглары  болмагъанла  сынамларын кючлерча  башха адамны къолунда кеслерин сынап кёрюрлерин да  эсгертгендиле.

Бизнес жеишимли болурча уа, кёбюсюнде   ишни  атлам-атлам (Step by step) халда бардырыргъа тюшеди. Экинчиси уа, аны  нек сайлагъанларын  ишексиз ангыларгъа, тутхан жолларындан  таймазгъа кюреширге кереклисин да билдиргендиле. 

Форумгъа жаш адамла тири къатышхандыла, тюрлю-тюрлю тематикагъа жораланнган танг кесек соруу  бергендиле, тынгылы жууапладан сора эсгертиуле да алгъандыла.  Форумну чеклеринде  ишчи жерлени ярмаркасы да болгъанды.  Жаш адамла кеслери жаратхан ишлеге  урунурча анкеталарын да къойгъандыла.

Бизни корр.