Россейни МЧС-ни регионда бёлюмюнден билдиргенлерича, 2023 жылны аллындан башлап от тюшгени бла байламлы 400 болум эсепленнгенди. Аланы 52-си адамла жашагъан жерледиле, иги кесеги уа къургъакъ кырдык кюйдюрюлгени ючюн болгъандыла. Бир адам къутхарылгъанды, 50 адам къоркъуулу жерледен чыгъарылгъандыла, 19 инсан жаралы болгъандыла, тёртеулен да ёлгендиле. 72 миллион сом багъасына мюлк сакъланнганды. 

От тюшгени бла байламлы къыйын болумланы биринчи сылтауу – инсан кесиди. Уллу кёллюлюкню, жорукълагъа эс этмеуню, эссизликни хатасындан адамлагъа, мюлклеге да къоркъуу чыгъады. Аны ючюн электро эм жылыу берген оборудование бла кюрешген хар заманда да къоркъуусузлукъгъа сакъ болургъа тийишлиди.

Къургъакъ кырдыкны кюйдюргенде жорукъланы бузгъанлары ючюн адамлагъа 11 протокол жарашдырылгъанды, терсленнген адамла барысы да административ жууаплылыкъгъа тартылгъандыла. Эсигизде болсун: ёртен жашау журтлагъа, юйлеге, агъачлагъа да кёчерге, уллу заран салыргъа, неден да аманы уа, ёлюмге келтирирге боллукъду.

Бу шартла бла байламлы МЧС эсге салады:

- бузугъу болгъан электропроводка бла бир заманда да хайырланмагъыз, электрообогревательлени салгъанда жорукъланы окъугъуз;

- жандырылгъан электро эм газ приборланы къараусуз къоймагъыз;

-  гитче сабийлени кеслерин къоймагъыз, алагъа от бла ойнаргъа жарамагъанын ангылатыгъыз, электроприборла эм газ оборудование бла хайырланыуну жорукъларын билдиригиз;

- печьни бла ожакъланы таза тутугъуз;

- жатхан жеригизде тютюн ичмегиз.

Къыйын болумгъа тюшген эсегиз неда от ёчюлтюучюлени болушлукълары керек эсе, экстренный службаны чакъырыгъыз, аны номери - «101».

Кульчаланы Зульфия.