Быйыл Къабарты-Малкъарда  сенгирчкеледен  бахчаланы сакъларча  тийишли ишлеге республикалы бюджетден эки миллион сом бёлюнюрюкдю.  Анга 2075 гектар чакълы бирде  химикатла чачдырылырча мадар этилликди, деп билдириледи КъМР-ни Эл мюлк министерствосундан.

 Эсге сала айтсакъ, сенгирчке жутлугъу бла битимлеге уллу заран салгъан къумурсхагъа саналады. Аны бла бирге терк жайылады, жерден жерге кёче, къысха заманны ичинде  танг кесек жерни бийлейди.  Бирде ачлыкълары бла  бахчаланы  жокъну орунуна жетдиредиле.  Ол себепден  алагъа  къажау турурча  эм игиси заманында профилактика жумушла бардырылсала  игиди.

Ахча болушлукъну хайыры, тийишли ишлени заманында тамамларгъа,  керек болса, энчи бир  къоркъуулу жерге  оператив халда эс бурургъа  онг табыллыкъды. Быллай ишлени баш магъанасы   жерчиликде уруннганланы уллу къоранчладан кери этергеди.

Бизни корр.