Къэбэрдей-Балъкъэрым Ухуэныгъэмрэ псэупIэ-коммунальнэ IуэхухэмкIэ и министерствэм хъыбар къызэритамкIэ, машинэхэр щызэхэзекIуэ гъуэгухэмрэ цIыху зекIуапIэхэмрэ зэгъэпэщыжыным, къэгъэщIэрэщIэжыным, щIыпIэ щхьэхуэхэм гъуэгу щытелъхьэным 2023 гъэми иужь итынущ. КъызэралъытамкIи, къэрал бюджетым къыхэкIыу гъуэгуухуэ Iуэхухэм сом меларди 4,1-рэ хуаутIыпщынущ.

Дызэрыт илъэсым щIыпIэ 30-м гъуэгуухуэ лэжьыгъэшхуэхэр къыщыхалъхьэнущ. Псори зэгъусэу елэжьынущ гъуэгу километри 100-м щIигъум. Япэ ирагъэщынущ жылагъуэм къэрал Iуэхутхьэбзэхэр хуэзыщIэ социальнэ IуэхущIапIэхэмрэ ди щIыналъэм зыплъыхьакIуэ къакIуэхэм хухэха зекIуэ лъагъуэхэмрэ. Абы къищынэмыщIауэ, къулыкъущIапIэм зэригъэпэщыжыну къыпэщылъщ Къармэхьэблэ - Хьэбэз, Старэ Шэрэдж (Дохъушыкъуей) - Жэмтхьэлэ (Къуэжьыкъуей Ипщэ) - Сукан-Су жылэхэр зэпызыщIэ гъуэгухэр. Апхуэдэу гъуэгу хуэIухуэщIэ лэжьыгъэшхуэ иращIэкIынущ Брамтэ - Хьэсэней - Джэрпэджэж къуажэхэр зэпищIэу Хьэсэнейрэ Джэрпэджэрэ я зэпылъыпIэм деж щыIэ гъуэгум. Дызэрыт илъэсым пащэнущ Шэджэм ЕтIуанэ - Булунгу къуажэхэр зэзыпх гъуэгур.

Гъуэгуухуэхэм къапэщылъщ гъуэгухэм асфальт къилъэлъар къытрахыу щIэ тралъхьэну, гъуэгум тещIэн хуей дамыгъэхэр къыхалыкIыжыну, абыхэм я нэхъыбэр иджырей мардэхэм тету зэрахъуэкIыну, гъуэгубгъухэм ирикIуэ лъэс лъагъуэхэр щIэрыщIэу яукъуэдиину, зэпрыкIыпIэхэмрэ зэблэкIыпIэхэмрэ яхуэфащэ нагъыщэхэмкIэ къыхагъэщыну, зекIуэкIэ хабзэхэм япыщIа IэрыщI гъуазэхэр гъуэгущхьэIухэм трагъэувэну. ЩыIэ хабзэщIэхэм кърагъэзэгъэжынущ Прохладнэмрэ Iуащхьэмахуэрэ зэпызыщIэ щIыналъэ гъуэгури. Абы къищынэмыщIауэ Зеикъуэ (ХьэтIохъущыкъуей Ипщэ) къуажэм деж Дыгъэмыхъуэрэ Хьэрэкхъуэрэрэ зэрипхыу Бахъсэныпсым телъ лъэмыжри трахынурэ щIэуэ тралъхьэжыну къапэщылъщ гъуэгуухуэхэм. Балъкъэрыщхьэ - Мухол, Май - Заречнэ - Новоивановскэ жылэхэр зэпызыщIэ гъуэгухэри мы гъэм зэрагъэпэщыжыну унафэ щыIэщ. Гъуэгум и щхьэфэр къэгъэщIэрэщIэжыным епха Iуэхухэм зэрыщIадзэрэ куэд щIакъым. Апхуэдэу щыт пэтми, лэжьыгъэ зыбжанэ зэфIэкIащ. Гъуэгуухуэхэм асфальт щIыIур трахащ, зекIуапIэр нэхъ бгъуэ ящIащ.

Къыхэгъэщын хуейщ «ЩIыналъэ икIи щIыпIэ гъуэгухэр, щIыналъэхэр зэпызыщIэ автомашинэ гъуэгухэр егъэфIэкIуэн икIи зегъэужьын» къэрал программэм ипкъ иткIэ щIыналъэхэм щыIэ гъуэгухэр зыхуей хуэгъэзэным сом мелард 1,4-рэ зэрытрагъэкIуэдэнур. Къэбэрдей-Балъкъэрым и щыхьэрым иIэ Къэбэрдей, Осетин уэрамхэр, 2-нэ Темэн дивизэм, Къалмыкъымрэ Щоджэнымрэ я цIэхэр зезыхьэ уэрамдэкIхэри къагъэщIэрыщIэжынухэм ящыщщ. Нэгъабэ лъандэрэ екIуэкI а лэжьыгъэр 2024 гъэм кърахьэлIэну я гугъэщ. КъалэкIыхьымрэ Нарткъалэрэ дэт уэрамышхуэхэри зэгъэпэщыжын хуейуэ яубзыхуахэм ящыщщ.

Гъуэгуухуэхэм я лэжьыгъэр абдеж къыщыувыIэнукъым. ИлъэсыщIэми къуажэ гъуэгухэр зэгъэпэщыжыным хуэунэтIа нэгъуэщI Iуэхугъуэ зыбжани къыхалъхьэнущ.

ШУРДЫМ Динэ.