Къэбэрдей-Балъкъэр Республикэм и прокурор Хабаров Николай  я IэнатIэм и ветеранхэмрэ лэжьакIуэхэмрэ ехъуэхъуащ Урысей Федерацэм и Прокуратурэм и лэжьакIуэм и махуэмкIэ. 

 - Къыщызэрагъэпэща зэманым щегъэжьауэ прокуратурэм и органхэр къэралым и щIэгъэкъуэн пэжу йокIуэкI, ар законым къыщхьэщож, цIыхубэр щхьэзыфIэфIагъымрэ хабзэншагъэмрэ ящехъумэ икIи абы иригъэкIуэкI лэжьыгъэм и хабзэ нэхъыщхьэр цIыхухэм я фIыгъуэм къыщхьэщыжынырщ.  
 Хабаров Николай къыхигъэщхьэхукIащ прокуратурэр зы унафэм щIэт IэнатIэ зэкъуэту зэрыщытыр икIи цIыхухэм я хуитыныгъэхэмрэ щхьэхуитыныгъэхэмрэ къызэгъэпэщынымкIэ, къэралым и Конституцэмрэ федеральнэ законхэмрэ къагъэув Iуэху нэхъыщхьэхэр хъумэнымкIэ мыхьэнэшхуэ зиIэ IэнатIэу къызэрекIуэкIыр. 
Прокуратурэм и лэжьакIуэхэм я щIэныгъэмрэ зэфIэкIымрэ куэдкIэ елъытащ цIыхухэм законыр я фIэщ зэрыхъур, цIыхубэм къащхьэщыжынымкIэ къэралым иригъэкIуэкI лэжьыгъэр.
Хабзэр хъумэным кIэлъыплъ ведомствэм илъэс куэдкIэ зэтеува IэкIуэлъакIуагъ бгъэдэлъщ. Абы и лъэныкъуэкIэ куэд ялэжьащ зэман кIыхькIэ IэнатIэ мытыншыр езыхьэкIа ветеранхэм. Республикэм и прокурорым къыхигъэщхьэхукIащ апхуэдэ цIыху гъуэзэджэхэм, зэман нэхъ гугъу дыдэхэми зи къалэнхэр емызэшыжу зыгъэзэщIахэм, нобэрей лэжьакIуэхэр зэрыригушхуэр. Абы жиIащ Урысей къэралыгъуэр адэкIи гъэбыдэнымкIэ, законыр ди гъащIэм и лъабжьэу сытым и дежи щытынымкIэ ведомствэм нобэ щылажьэ цIыхухэм яхузэфIэкI къызэрамыгъанэр.
- Ветеранхэм, прокуратурэм и нобэрей лэжьакIуэхэм фIыщIэ ин яхузощI, - и псалъэм и кIэухыу жиIащ Хабаров Николай. - Я IэщIагъэм зэрыхуэпэжым, къабгъэдэхуэ къалэнхэр гъэзэщIэным хьэлэлу зэрыбгъэдэтым папщIэ. СигукIи си псэкIи псоми сохъуэхъу узыншагъэ быдэ, ефIэкIуэныгъэ яIэну, Урысейм и фIыгъуэр гъэбэгъуэным хуэлэжьэнымкIэ къулыкъу мытыншым ехъулIэныгъэщIэхэр къыщахьыну. 

Дыгулыбгъу Жантинэ.