КъМР-ни Жарыкъландырыу эмда илму министерствосунда «Жылны устасы» деген битеуроссей конкурсну регион бёлюмюнде биринчи, экинчи эмда ючюнчю жерлеге тийишли болгъанланы юйретген устазланы саугъалаугъа жораланнган тюбешиу болгъанды.
Аны башлай, ведомствону таматасы Анзор Езаов кетип баргъан жылда республикада профессионал билим бериу жаны бла усталаны хазырлауда аламат жетишимле болдурулгъанларын чертгенди. Келе тургъан 2023 жыл да хайырлы, жетишимли боллугъуна ийнаннганын билдиргенди.
Министрни орунбасары Мокъаланы Ачемез да конкурслагъа къатышханланы бла аланы юйретгенлени алгъышлагъанды, насып, саулукъ да тежегенди.
«Жылны устасы» битеуроссей конкурсну юсюнден а КъМР-ни Жарыкъландырыу эмда илму министерствосуну бёлюмюню таматасы Оксана Белоусова этгенди.
-Бу конкурс педагогну ишине тийишли багъа берир, даражасын кётюрюр, алчы сынауну кенг жайыугъа, кадрланы хазырлаугъа себеплик этер мурат бла къуралгъанды. Анга профессионал усталыкъгъа юйретген, битеулю билим берген преподавательле къатышадыла. Быйыл ол экинчи кере бардырылады. Бу жол ол Саранск шахарда ётгенди. Анга РФ-ни 85 регионундан 45-ден артыкъ усталыкъгъа юйретген эки минг бла жарымдан аслам устаз къатышханды. Анда бизни республикадан жетеулен айырмалы болгъанды,-дегенди Оксана Анатольевна.
Андан сора хычыуун жумуш да башланнганды. Анзор Клишбиевич, Ачемез Магомедович да айырмалылагъа дипломла, сертификатла, саугъала да бергендиле. Алагъа тийишли болгъанланы араларында Элбрус регион колледжден Алийланы Джамиля, КъМКъУ-ну дизайн колледжинден Хаджиланы Залина, Къабарты-Малкъар автомобиль –жол колледжден Эльчапаров Аслан да бардыла. Ала барысы да «Жылны устасы» битеуроссей конкурсну регион кезиуюнде хорлагъанладыла.
«Жаш профессионалла» онунчу миллет чемпионатны ахыр кесегинде уа КъМР-ни жыйымдыкъ командасындан была хорлагъандыла: Севилья Шакирова, Милана Мирзаканова, Тамерлан Кунашев, Любовь Куранова.
Далхатланы Марзият.