КъМР-ни Башчысы Казбек Коков РФ-ни спортуну сыйлы устасы, грек-рим тутушуудан эки Олимпиаданы да чемпиону, дунияны юч къатлы, Европаны тёрт къатлы чемпиону Роман Власов бла ишчи тюбешиу бардыргъанды. Айтхылы спортчу республикагъа 2016 жылдагъы Олимпиаданы призёру Аниуар Гедуев бла грек-рим эмда эркин тутушуудан мастер-классла бардырыр ючюн келгенди. Тюбешиуге КъМР-ни спорт министри Ислам Хасанов да къатышханды.

Ушакъны кезиуюнде спортну, ол санда аны тутушуу тюрлюлерин, айнытыуну онглары сюзюлгендиле, гёжефлени хазырлауда юйретиуге энчи эс бурургъа, аланы бютюн бийик жетишимлеге кёллендирирге кереклиси чертилгенди. Роман Власов спортну тутушуу тюрлюлерин айнытыргъа регионда уллу онгла болгъанларын айырып айтханды. Сынаулу эмда уста тренерле, битеуроссей эмда халкъла аралы эришиуледе атларын айтдыргъан спортчула да бардыла. Къабарты-Малкъар грек-рим эмда эркин тутушуудан битеукомандалы зачётда алчыланы санына киреди, деп чертгенди. Казбек Коков а: «Биз спорт школлада тренерлени хакъларын кётюрюу эмда спорт инфраструктураны кючлендириу жаны бла мадарланы андан ары бардырлыкъбыз»,- дегенди.

Тюбешиуде сёз тутушуугъа уллу мекям ишлеуню юсюнден да баргъанды. Аллай зал болса, Шимал-Кавказ федерал округну битеу регионларындан спортчуланы бизни республикада жыяргъа, регионла аралы эмда битеуроссей эришиуле, жараула да бардырыргъа онг чыгъарыкъды. Роман Власов Къабарты-Малкъарда битеуроссей чемпионатны жыл сайын бардырыуну дурус кёргенди. Республиканы оноучусу ол башламчылыкъгъа ыразы болгъанды эмда ол сюзюллюгюн айтханды.

Ахырында Казбек Коков Роман Власовну Къабарты-Малкъар Республика къуралгъанлы 100-жыллыгъына жораланнган майдал бла саугъалагъанды. «Россейде, бизни республикада да спортну тутушуу тюрлюлери айныр ючюн бирге къолубуздан келгенни аярыкъ тюйюлбюз»,- дегенди.