«ЗэгурыIуэныгъэмрэ» «Аб­хъа­зымрэ» я ут нэхъыщхьэхэм я зэхуакум къыщызэIуахынущ иджы­ри зы лъэс зекIуапIэ.

Зэман куэд ипэкIэ хаса мыIэрысейхэр, кхъужьейхэр, уэздыгъейхэр куэду щызэхэт а щIыпIэ лъэщIэхур сыт щыгъуи къабзэу, лъэсырызекIуэхэм хаша лъагъуэ нэшэкъашэ цIыкIухэм фIэкIа нэгъуэщI уи нэм къыфIэнэн щумы­лъагъуу нобэм къэсащ. Мы зэманым ар хуа­гъэхьэзыр Къэбэрдей-Балъкъэрыр илъэси 100 щрикъуну пIалъэм.
Абхъазым и утым щегъэжьауэ «Спартак» стадионым нэсыху кIуэну лъагъуэ бгъуфIэм и лъабжьэр ягъэхьэзыращ, абы тракIутэну пша­хъуэмрэ мывэ кIэщхъымрэ, гъущI- бетон къэухьхэр кърашэлIащ, тетIысхьэпIэхэр здагъэувыну утыкухэр ягъэбелджылащ. Скверым пхашынущ нэхъ лъагъуэ цIыкIуу иджыри зыбжанэ. Лэжьыгъэ хьэлъэр з­эры­зэфIэкIыу, ихъуреягъыр ягъэдэхэнущ удз гъэгъахэмрэ щхъуантIагъэхэмкIэ.
Лъэс зекIуапIэр щаукъуэдийм зыкIи зэран хуэхъуакъым, ныбжьышхуэ зэраIэми емылъытауэ, нобэми пхъэщхьэмыщхьэ бэгъуа къызыпыкIэ жыгыжьхэм. А щIыпIэм къыбгъэдэт Сабий творчествэмкIэ уардэ унэм ­къекIуалIэ цIыкIухэмкIи дэрэжэгъуэщ апхуэдэ зыгъэпсэхупIэ гъунэгъуу щыIэныр. Зыхуеину техникэхэмкIэ къызэгъэпэща ухуакIуэхэр псынщIэу мэлажьэ, махуэшхуэр къэмысу псори зэфIагъэкIыну я мурадщ.
Шэрэдж дисэ.