Кёп болмай Къабарты-Малкъар къырал университетде «Жаш тёлю предприниматель» деген тюбешиу болгъанды. Анга жетмишден аслам студент эм бизнесменле бла экспертле къатышхандыла.
Жаш тёлю бла экономикадан специалистлени хазырлау бёлюмге кёп жылланы башчылыкъ этип тургъан, КъМКъУ-ну кадрла эм къурау-право соруула жаны бла проректоруну къуллугъун толтургъан Мурат Гукепшоков да ушакъ этгенди. Жаш специалистлеге насийхат эте, ала жетишимли болур ючюн вузну бошай тургъанда окъуна къайсы иш бла кюрешириклерин таукел ангыларгъа керек болгъанларын белгилегенди.
Ызы бла КъМР-ни Парламентинде Жаш тёлю палатаны экономика, жаш тёлю предпринимательство эм урунуу жаны бла комиссиясыны башчысы эм тюбешиуню да къурагъан Анзор Афашагов сёлешгенди. Ол айтханыча, быллай жыйылыуну магъанасы - жаш адамланы предпринимательстволукъгъа итиндириргеди, билимлерин ёсдюрюргеди, сынамларын кючлергеди, проектлерин бардырыргъа болушургъады.
Чакъырылгъан къонакъла: «Аура» спортклубну, «Dakshin dress» салонну, ингилиз тилден «Лондон экспресс» школну, «Ниже нуля» тюкенни таматалары Артур Гамидов, Карина Докшокова, Инал Карданов эм Теймураз Кунижев сынамларыны юсюнден айтхандыла. «МСП Банк» финанс учрежденияны таматасы Байсултанланы Асхат, «Гранд» биригиуню председатели Светлана Гуева, предпринимательлеге болушлукъ бериу жаны бла юрист Назифа Маремукова уа бизнес бла кюрешгенле къыралдан къаллай болушлукъ табаргъа боллукъларыны юсюнден толу хапар билдиргендиле.
Магометланы Сулейман.
