КъМР-ни Маданият фондунда 1941-1945 жыллада болгъан Уллу Ата журт урушда Хорламгъа жоралап «тёгерек стол» болгъанды. Аны  Къабарты-Малкъар Республиканы  Миллетлени ишлени эмда жамауат  проектле жаны бла  министерствосу къурагъанды. Анга республикада болгъан кёп тюрлю миллет маданият араланы башчылары эмда жамауат биригиулени келечилери чакъырылгъандыла.

Тюбешиуге келгенле биргелерине Хорламны жууукълашдыр ючюн жанларын-къанларын аямагъан аталарыны, аппаларыны, башха жууукъларыны суратларын да келтирген эдиле. Ол кюн дагъыда  китапладан бла суратладан кёрмюч да къуралгъанды. Китапланы  Т.Мальбахов атлы миллет китапхана бергенди. Аланы араларында уруш жыллада этилген жигитликлени юсюнден эртте басмаланнганла эмда бу кюнледе дуния жарыгъын кёргенле да бар эдиле.

Миллетлени ишлери эмда жамауат проектле жаны бла  министрни  орунбасары  Гергъокъланы Жамболат, «тёгерек столну» ача, былай  чертгенди: «Алгъыннгы Совет Союзну жеринде жашагъан кёп мингле бла  миллетлени адамларын бирикдирген  Уллу Хорламны кюню Россейни халкъларына,  ненча жыл озса да, бек магъаналы эмда бек жарыкъ байрамладан бири болгъанлай къаллыкъды. Бизни борчубуз -  аны юсюнден айтып, ангылатып, эмда келир тёлюлеге сакълауду. Бир танкны ичинде  оруслу, къазакълы, дагъыстанлы да кюйгендиле, ала, Ата журтну душмандан  азатлай, миллетлеге эмда динлеге юлешинмегендиле».

Министрни орунбасары  бюгюнлюкде да энчи аскер операциягъа къатышхан жашларыбыз да, ата-бабаларыны ахшы тёрелерине кертичи болуп, къыралыбызны жалынчакъсызлыгъы ючюн кеслерин аямай къазауат этгенлерин да чертип айтханды. Ол энчи аскер операция  жамауатны кёп затха башха кёзден къарарча этгенин да чертгенди.  Адамла бла урушну, анда болдурулгъан кишиликни  юсюнден сёлеширге, аны магъанасын  ангылатыргъа кереклисин да эсгертгенди. 

Жыйылыуда республикада жашагъан украинлыланы  «Днепро» миллет араларыны башчысы Светлана Харенко, белорусланы «Сябры» жамауат биригиулерини башчысы  Павел Сидорук, азербайджанлыланы «Азари» араларыны башчысы Али Дадашев, дагъыстанлыланы миллет маданият араларына башчылыкъ этген   Ибрагим Сурхайханов да сёлешгендиле эмда жаш тёлюню патриот ниетде юйретиу жаны бла не мадарла этгенлерини юсюнден хапарлагъандыла.

«Тёгерек столну» кезиуюнде сёз мамырлыкъны сакълауну, Уллу Хорламны магъанасыны юсюнден да баргъанды. Сёлешгенле тарыхны унутуу игиликге келтирмегенин айтып, анга  бу кюнледе Украинада бола тургъан ишле шагъатлыкъ этгенлерин да эсгертгендиле. Жаш адамла Россейни тарыхын бютюн терен билир ючюн  не этерге кереклисин сюзгендиле.
Ахырында къазакъланы «Родник» жырчы къаууму, уруш жылланы жырларын жырлап, жыйылгъанланы ыразы этгендиле. Концерт «Хорламны кюню!» деген жыр бла бошалгъанды.

Холаланы Марзият.