Кёп болмай Чегем сууну башы бла  ётген «Кавказ» Р-217 федерал жолда кёпюрге тынгылы ремонт этип башлагъандыла.  Бусагъатда подряд организация объектни  бузуп кюрешеди. Росавтодорну автомобиль жоллагъа къарагъан «Кавказ» управлениясыны келечилери  ишлени саулай быйыл сентябрьни ахырына бошарыкъдыла, деп билдириледи КъМР-ни Транспорт эм жол мюлк министерствосуну  пресс-службасындан.

Эсге сала айтсакъ,  кёпюр 2009 жылда 1950 жыллада салыннган  кёпюрню орунуна  ишленнген эди. Аны къатында  экинчи кёпюр а   2018 жыллада сюелтилиннгенди. Машиналаны санына танг къошулгъаны ючюн, ол санда ауур жюк ташыгъанла былайтын аслам жюрюгенлери  ючюн, анга уллу ауурлукъ жетип,  къысха заманны ичинде бузулуп башлагъанды.

Тынгылы ремонт ишлени кезиуюнде кёпюрню кючлегенлеринден сора да, кенлигине эки метр къошуп,   11 метрге жетдирликдиле. 

Ишлени кезиуюнде специалистле, кёпюрню чачып, чыпынларыны мурдорун кючлерикдиле эм аланы суу  таламазча этерикдиле. Ызы бла  жангы аркъаула бла плитала  саллыкъдыла эм башха затланы да тамамларыкъдыла. Саулай айтханда, объект  жангы мардалагъа келиширча боллукъду. 

Бусагъатда машинала эки ызлы жол бла жюрюйдюле. Аны себепли къоркъуусузлукъ сакъланырча тийишли мадарла да этилгендиле. 

Магометланы Сулейман.