КъМР-ни Башчысы Казбек Коков Къоркъуулу болумланы тохтатыу эм ала келтирген заранны кетериу эмда от тюшюуге къажау комиссияны жыйылыуун бардыргъанды. Анда къутхарыучула жылны ичинде толтургъан ишни эсеплери чыгъарылгъандыла, келир жылгъа борчла белгиленнгендиле. Жангы жылны байрамларыны кезиуюнде къоркъуусузлукъну сакълаугъа бурулгъан жумушла да сюзюлгендиле.
Кенгешни аллында уа Казбек Валерьевич къутхарыучуланы профессионал байрамлары бла алгъышлагъанды. Ол МЧС-ни къуллукъчулары кеслерини жашауларына, саулукъларына къоркъуу болгъанына да къарамай, къыйын болумгъа тюшгенлеге мычымай болушлукъгъа келгенлерин, бу усталыкъны керти да жигитле сайлагъанларын чертгенди.
– Бизни къутхарыучула батырлыкъларын, ишлерин билгенлерин, антларына кертиликлерин кёп кере кёргюзтгендиле. Анга уа биз, жарсыугъа, быйыл сентябрьде да шагъат болгъанбыз. Къыйын табийгъат болумда Элбрусда ала альпинистлени жанларын сакълагъандыла. Жылны ичинде уа ала жюзден да аслам адамны къутхаргъандыла,-дегенди ол.
Казбек Валерьевич службаны ырысхы-техника базасын игилендириуге, ведомствода ишлегенлени социал излемлерин жалчытыугъа, ишчи болумларын тапландырыугъа баш магъана берилгенин, власть органла бу сорууланы контрольда тутханларын да айтханды. «Сёзге, тюбешиуню аллында От тюшюуге къажау къырал службагъа 5 техника берилгенди, андан сора да, къутхарыучуланы къырал саугъала бла белгилеу жаны бла указгъа къол салыннганды»,-деп къошханды ол.
РФ-ни МЧС-ини республикада бёлюмюню жылны аллындан бери тамамлагъан ишлерини эсеплерин чыгъарырдан алгъа уа ведомствону къуллукъчулары къаллай болумлада ишлегенлерини юсюнден къысха фильм кёргюзтюлгенди.
Управленияны башчысы ич службаны генерал-майору Михаил Надёжин быйыл халкъны къоркъуусузлугъун жалчытыугъа, къыйын болумладан сакълау жумушланы игилендириуге бурулгъанын чертгенди. Жылны ичинде 350 жумуш бардырыргъа белгиленнген эди да, ала барысы да толтурулгъандыла. Ол санда тюрлю-тюрлю болумлада къутхарыу жумушлагъа юйретиу жаны бла 491 иш къуралгъанды, алагъа 14 мингден аслам адам къатышханды.
Быйыл а республикада 4 техноген эм табийгъат болум, социал магъаналы 28 иш болгъандыла. «Эльбрус» бийик-тау отрядны къуллукъчулары республиканы тауларында 167 излеу-къутхарыу жумушну толтургъандыла. Аланы кезиуюнде 168 адам къутхарылгъанды, къыйын болумгъа тюшген 199 инсаннга болушлукъ этилгенди. Жарсыугъа, 25 адам таулада ауушхандыла. «Бу жумушланы асламы къыйын табийгъат болумланы кезиуюнде толтурулгъанларын айтыргъа сюеме»,-дегенди Михаил Надёжин.
От тюшюуге къажау эм къутхарыу жумушланы тамамлагъан службаланы ишлерин бирге тийишдирир мурат бла уа республикада от тюшюуге къажау-къутхарыу гарнизон къуралгъанды. Битеу да бирге ол 49 бёлюмню бирикдиргенди, алада 1,8 мингден аслам адам ишлейдиле, 259 техника барды.
Жылны аллындан бери от тюшюуге къажау федерал эм Къабарты-Малкъар службаланы къуллукъчулары 2,3 мингден аслам кере чакъырылгъандыла. Къыйын болумланы кезиуюнде 600 адам къутхарылгъанды, 800 миллион сом багъасы ырысхы сакъланнганды. «Службаны къуллукъчулары терк эм бирге келишип ишлегенлерини хайырындан республикада бу жаны бла уллу къыйынлыкъла болмагъандыла»,-дегенди докладчы.
Жолда авариялагъа от тюшюуге къажау-къутхарыу служба 420 кере чакъырылгъанды. Алада 502 инсаннга болушлукъ этилгенди, 300 адам къутхарылгъанды. Жарсыугъа, 96 инсан ауушхандыла.
Ведомствону башчысы от тюшюуге къажау федерал служба шёндюгю техника бла жалчытылыннганын энчи белгилегенди. Докладда от тюшюуледен сакъланыу жумушланы кеси ыразылыкълары бла бардыргъан биригиулени юслеринден да айтылгъанды. Бюгюнлюкде 279 жамауат биригиу къуралгъанды, алада 1,5 мингден аслам адам бардыла.
Келир жылдан башлап КъМР-де «112» бирикдирилген диспетчер служба ишлеп башларыгъын эсгертгенди Михаил Надёжин. Алай ол борчларын толу кючю бла хайырлы толтурур ючюн а, кадрла бла жалчытылыныргъа кереклисин белгилегенди ол.
Жангы жылны эм Рождествону кезиуюнде халкъны къоркъуусузлугъун жалчытыуну юсюнден айтханда, къууанч жыйылыуланы 102 жерде бардырыргъа белгиленеди. Ведомствону башчысы айтханыча, МЧС-ни келечилери аланы барысын да сюзгендиле, ачыкъланнган кемчиликле бла байламлы эсгертиуле чыгъарылгъандыла. Бюгюнлюкде ала барысы да кетерилгендиле.
– 2022 жылда 10 январьгъа дери кезиуде къутхарыучула къуллукъ этиуню энчи низамына кёчюрюлгендиле,-деп чертгенди Михаил Надёжин.
Жыйылыуда сёз таулада къар юзюлюуледен сакъланыу жумушланы юслеринден да баргъанды. Метеорология эм башха геофизика болумлагъа къажау Шимал-Кавказ аскер службаны башчысы Чочайланы Хызыр билдиргенича, федерал излемлеге тийишлиликде, 2022 жылда 1 январьдан башлап, ведомствону ишинде тюрлениуле болгъандыла. Алагъа тийишлиликде, къар юзюлюуледен сакълау жумушла жаланда келишимлеге кёре толтуруллукъдула. Бюгюнлюкде тёртюсю къабыл кёрюлгендиле, ол санда Элбрус районну эм Элбрус элни администрациялары бла.
Битеу да бирге уа тау жерлени къар юзюлюуледен сакълау жумушлагъа 70 миллион сомгъа жууукъ керекди. Аладан 46,5 миллиону – федерал трассаланы къоркъуусузлукъларын жалчытыугъа.
Докладланы сюзе, Казбек Коков федерал жолланы иелери бла келиширге, сакъланыу жумушлагъа ахча бёлюрге буюргъанды. Дагъыда ол къутхарыучуланы хакъларын сюзерге, «112» бирикген службаны ишинде чырмауланы кетерирге кереклисин да белгилегенди.
Кенгеш жууаплы органлагъа эсгертиуле къабыл кёрюу бла бошалгъанды.
Ахырында Казбек Коков жыйылгъанланы Жангы жылны байрамы бла алгъышлагъанды эмда солуу кезиуде республикагъа туристле кёп санда келликлери белгиленнгенин чертгенди. Аны себепли ол жууаплы ведомстволаны байламлыкъда ишлерге чакъыргъанды.
Тикаланы Фатима.
