КъМР-ни Башчысы Казбек Коков ишчи жумуш бла Чегем районда болгъанды, ол Хушто-Сыртны бла Чегем чучхурланы ортасында жолгъа къарагъанды. Анда ишле Экинчи Чегем-Булунгу деген жолну жангыртыу бла байламлы комплексли мероприятияланы чеклеринде жууукъ заманда башланырыкъдыла.
Республиканы оноучусу бла бирге ишчи жолоучулукъда КъМР-ни Парламентини Председателини орунбасары Жанатайланы Салим, КъМР-ни транспорт эм жол мюлк министри Аслан Дышеков, Чегем районну администрациясыны башчысы Юра Борсов болгъандыла.
Экинчи Чегем-Булунгу жолну узунлугъу 65 километр болады, ол Экинчи Чегемни чеклеринде Р-27 «Кавказ» федерал жолдан тебиреп башланады, сора Лячинкъаяны, Тёбен Чегемни, Хушто-Сыртны, Эл-Тюбюню ичи бла Булунгугъа дери барады. Жол ол элледе жашагъанлагъа уллу магъананы тутады эм Къабарты-Малкъарны эм белгили турист маршрутларындан бирине саналады, кеси да Чегем тарыны ариу жерлерине элтеди.
Къабарты-Малкъарны Башчысыны Казбек Коковну буюурууу бла, КъМР-ни Транспорт эм жол мюлк министерствосу Экинчи Чегем-Булунгу автомобиль жолну тап халгъа келтириу бла байламлы къурулуш ишле башланнгандыла. Жылны ахырына дери КъМР-де регион жол фондну ырысхыларына Экинчи Чегем-Булунгу жолда Чегем чучхурладан тебиреп Булунгугъа дери 22 километр жолгъа зыгъыр къуюлуп, тапландырылып бошаллыкъды. Аны хайырындан жолну техника хали иги кесекге игиленирикди.
2022 жылда жол Тёбен Чегемден тебиреп Хушто-Сыртха эм андан ары Чегем чучхурлагъа дери ремонт этилликди, чыракъла салынырыкъдыла, тротуарла ишленирикдиле эм адамла табийгъатха къарарча жерле къураллыкъдыла. Битеу узунлугъу 5,5 километрге жетген Тёбен Чегемни бла Хушто-Сыртны ортасында жолгъа КъМР-ни регион жол фондуну ырысхыларына тынгылы ремонт этилликди. Ол тийреледе саулай да 10 километр узунлугъу болгъан жерде чыракъла жанарыкъдыла.
Казбек Коков социальный сетьде болгъан энчи бетинде билдиргеннге кёре, 2023 жылда Экинчи Чегем -Булунгу автомобиль жолну Эл-Тюбю бла Булунгуну ортасында жолну федерал бюджетге къошуп, ремонту бардырыллыкъды эм ол тийреледе чыракъла жанарча этилликдиле.
Ол объектлени эл жерлени айнытыу бла байламлы къырал программагъа къошаргъа мурат барды. Андан сора КъМР-ни регион жол фондуну ырысхыларына Экинчи Чегем-Булунгу автомобиль жолда Лячинкъаядан тебиреп 15 километрге асфальт салыргъа онг изленеди.
Бизни корр.
